Die Knoop

Die Knoop is 'n Afrikaanse skakelys of portaal wat deur die Pretoriase ingenieur, Gerrie de Beer, gestig en onderhou word. Dit is een van die eerste en beslis een van die grootste Afrikaanse skakellyste op die web. Die Knoop kry in 2007 gemiddeld 750 besoeke per dag. Die webwerf se gewildheid onder Afrikaners is daaruit duidelik dat ruim driekwart besoekers die URL sélf intik om by die webwerf te kom.

Geskiedenis

Die Knoop het begin as 'n skakellys op een van De Beer se persoonlike webwerwe, wat gehuisves is te www.geocities.com/Heartland/9657/dieknoop.htm. In 1998 het De Beer die domeinnaam dieknoop.co.za gekoop en die Geocities-webwerf daarheen laat herverwys.

Die skakellys was aanvanklik 'n enkele bladsy, maar kort nadat die hoeveelheid skakels die duisend-getal oorsky het, is sommige groter afdelings op aparte bladsye geplaas. Die Knoop se slogan was vroeër "honderde Afrikaanse skakels", en het later verander na "duisende Afrikaanse skakels".

Dit is waarskynlik dat Die Knoop sy ontstaan gehad het nadat Gerrie kontak met Afr Oppie Net gehad het.

Mettertyd het De Beer ander domeinname opgekoop om na Die Knoop te herlei. Een hiervan was afrikaans.co.za, want tans nie meer deur De Beer besit word nie.

Die Knoop maak tans ruimskoots van advertensieskakels gebruik, en heelwat van die "nuwe" skakels is niks meer nie as geborgde skakels wat nie as sulks aangedui word nie. Dit maak egter nie Die Knoop minder gewild onder sy gebruikers nie.

Kampvegter vir Afrikaans

Die Knoop se gewildheid onder Afrikaanse besoekers het vroeg reeds sekere Suid-Afrikaanse maatskappye genoop om hul webwerwe in Afrikaans beskikbaar te stel. Hier onder tel die bankreus ABSA, wat reeds in 1997 op Die Knoop gekasty is vir sy toentertydse gebrek aan Afrikaans.