Baakensrivier

Die Baakensrivier (Bakensrivier) mond by Port Elizabeth se middestad en hawe in Algoabaai uit.

Die rivier vloei vir ongeveer 23km vanaf sy opvanggebied by Sherwood, Hunter’s Retreat en Rowallanpark deur hoofsaaklik stedelike gebied na sy mond. Meesal is dit ‘n klein rustige stroompie. Naby sy mond loop dit in ‘n kloof aan die suidekant van die heuwel waarop Fort Frederick lê.

Totdat die eerste VOC-skepe hier in 1690 aangedoen het, was die spruit bekend onder die Khoikhoi-naam Kragga Kama, die klipperige spruit. In 1752 kom vaandrig August Beutler hier verby en rig namens die VOC by die riviermond ‘n baken op.

Mettertyd is die laaste 2km van die stroom gekanaliseer en die klein strandmeer opgevul. In dele van die Baakensvallei is parke, sportterreine en wandelpaaie aangelê. Die Setlaarspark van 54ha bestaan sedert 1938. Die vallei was in die jare 1867,1897, 1908, 1968, 1981 en 2006 die toneel van ernstige vloede, oorstromings en groot skade. Op 5 Mei 1897 was die oorsaak ‘n wolkbreuk by Hunter’s Retreat. Op Sondag 1 September 1968 het dit net na 8vm begin reën en binne ‘n kort tydjie het meer as 560mm geval. In die mees verwoestende vloed wat Suid-Afrika tot op daardie tydstip ervaar het, het 8 mense hul lewens verloor.

Eksterne skakels

• http://www.baakensvalleyaction.co.za/the-river
• https://en-za.topographic-map.com/maps/z6fk/Baakens-River/ Topografiese kaart van die rivier.
• http://thecasualobserver.co.za/port-elizabeth-yore-happened-baakens-lagoon/