Samuel Alito

Sjabloon:Infobox rechter Sjabloon:Infobox rechter Samuel Anthony Alito Jr. (1 April 1950, Trenton) is 'n Amerikaanse regsgeleerde van Italiaanse afkoms wat tans 'n assosiaat-regter van die Federale Hooggeregshof is.

Hy studeer aanvanklik aan Princeton-universiteit, en later vanaf 1972 tot 1976 aan Yale-universiteit in Connecticut. Daarna dien hy as regsadviseur vir 'n aantal regters en aanklaers in New Jersey en Pennsylvania.

Alito is 'n praktiserende Katoliek . Hy en sy vrou Martha woon in West Caldwell, New Jersey. Hulle het twee kinders.

Tydens 2020 se bestrede presidensiële verkiesing het Regter Alito gelas dat stembriewe wat na 3 November 2020 (stemdag) ontvang was apart gehou moet word van die wat voor die datum ontvang is. Die bevel kan gesien word as ‘n oorwinning vir die veldtog van president Donald Trump, wat herhaaldelik beweer het dat die telproses met verskeie ongerymdhede besoedel is..

Regter

Regter Alito is in 1990 deur president George HW Bush aangestel om in die appèlhof vir die deelstate van Pennsylvania, Delaware en New Jersey te dien; hy was aldaar bekend om sy konserwatiewe sienings. Hy het dikwels nie saamgestem met die ander drie regters nie. Sy regspraak toon ooreenkomste met die van die ontslape hooggeregshofregter Antonin Scalia: hul konserwatiewe interpretasie van die Grondwet en hul Italiaanse oorsprong, het veroorsaak dat sommige regslui aan die appèlhof aan hom die bynaam "Scalito" (klein Scalia) besorg het.

In verband met aborsie stem hy in 1991 daarteen om 'n wet in Pennsylvania ongrondwetlik te verklaar wat vereis dat 'n getroude vrou wat 'n aborsie wil hê, haar man daarvan moet in kennis stel (sien Planned Parenthood v. Casey). Die hooggeregshof het egter later wel beslis dat hierdie wet ongrondwetlik is.

In 2000 het hy egter ander regters gevolg in 'n besluit om 'n wet in New Jersey wat verband hou met laat vrugafdrywing ongrondwetlik te verklaar. Die hof het beslis dat die staat uitsonderings moet verskaf vir gevalle waar die gesondheid van vroue in gevaar gestel word. Dit hou verband met die onlangse saak in die Hooggeregshof van Stenberg v. Carhart (2000), wat 'n wet van die deelstaat Nebraska ongeldig verklaar het omdat dit nie vir daardie uitsondering voorsiening gemaak het nie.

Benoeming tot die Hooggeregshof

Op 31 Oktober 2005 het George W. Bush Alito as hooggeregshofregter in Washington DC ter vervanging van regter Sandra Day O'Connor benoem. Die Senaat se komitee het hom op 24 Januarie 2006 aanbeveel. Hy het die steun van die tien Republikeine in hierdie komitee ontvang, terwyl die agt Demokratiese komiteelede teen sy kandidatuur gestem het.

Die destydse demokratiese senatore John Kerry en Edward Kennedy het op die nippertjie probeer om nog 'n stemming oor Alito te blokkeer deur die filibuster te gebruik. Hierdie prosedure vereis 41 stemme teen die afsluiting van die debat en word dikwels gebruik om te voorkom dat 'n wet geblokkeer word waarvoor 'n gewone meerderheid vereis word. Die Republikeine het egter reeds in Mei gedreig om die "nuclear option" (of grondwetlike opsie) te gebruik, wat die Demokrate van die geleentheid sou ontneem om die filibuster te gebruik.

'n Konfrontasie hieroor is egter voorkom deur 'n kompromie tussen 14 senatore, waarin sewe Demokrate beloof het om die filibuster slegs in buitengewone omstandighede te gebruik, met sewe Republikeine wat belowe het om teen die "nuclear option" te stem. Die senatore is die "gang of fourteen" genoem, en sonder hulle was daar derhalwe nie 'n meerderheid vir die "nuclear option" of 'n meerderheid vir 'n filibuster nie.

Uiteindelik het die "gang of fourteen" besluit dat Alito nie 'n filibuster regverdig nie. Die poging om 'n stemming oor Alito te blokkeer, misluk dus op 30 Januarie 2006, met 72 stemme teen 25 teen die afsluiting van die debat. Die volgende dag is Alito met 58 teen 42 stemme deur die Senaat van die Verenigde State bevestig.

Hooggeregshof

In sy eerste beslissing stem Alito saam met die meerderheid van die hof teen die uitstel van die teregstelling van 'n man uit Missouri wat aangevoer het dat teregstelling deur dodelike inspuiting ongrondwetlik kan wees. Regters John Roberts, Antonin Scalia en Clarence Thomas het gestem om die uitstel op te hef, wat van groot belang was, aangesien daar algemeen verwag is dat Alito by laasgenoemde regters sou aansluit. President Bush het tydens die presidensiële veldtogte belowe om regters soos Scalia en Thomas, twee gunstelinge van die konserwatiewe beweging, aan te stel.

Eksterne skakels

• Amptelike biografie van die Amerikaanse owerheid
• Teks van Alito se benoeming as van die hooggeregshof