Bathurst, Oos-Kaap

Hierdie artikel handel oor 'n dorp in Suid-Afrika. Vir die voormalige Gambies hoofstad, sien gerus Banjul.

Bathurst, 'n dorp tussen Port Alfred en Grahamstad in die provinsie Oos-Kaap, Suid-Afrika, lê in die hart van die gebied waar die 1820-Setlaars hulle gevestig het. Vir 'n lang tyd dien dit ook as die godsdienstige sentrum van die immigrante. Die kerk St. John, wat ook as die Setlaarskerk bekend staan, word vanaf 1832 opgerig. Tydens aanvalle van die Xhosa-stam dien dit ook as 'n toevlugsoord vir die inwoners van die dorp.

Die Ou Wolmeul aan die oewer van die Bathurstrivier dateer uit die jaar 1822. Dit is die eerste van sy soort in Suid-Afrika. Samuel Bradshaw, 'n wewer uit Gloucestershire, rig die meul op om die groot tekort aan komberse en warm klere, wat die setlaars destyds pla, te verlig.