Boergondië

Wapenskild van die tweede Hertogdom van Boergondië en later die Franse provinsie Boergondië

Boergondië (Frans: Bourgogne; Duits: Burgund; Engels: Burgundy) is 'n streek wat histories in die hedendaagse Frankryk en Switserland geleë is. Dit is oorspronklik deur die Kelte bewoon en later deur Romeine. Dit is in die 4de eeu deur die Romeine aan 'n Germaanse volk, die Boergondiërs toegeken wat hulle daar in hulle eie koninkryk gevestig het. Hierdie Boergondiese Koninkryk is in die 6de eeu deur die Franke verower wat die koninkryk onder hulle beheer in stand gehou het.

Later is die gebied verdeel in die Hertogdom van Boergondië (Frans: Duché de Bourgogne), die westelike deel, en die Graafskap van Boergondië (Frans: Comté de Bourgogne), die oostelike deel. Die Hertogdom van Boergondië is die meer bekende van die twee. Die Hertogdom van Boergondië het in 1542 as die Generaliteit van Boergondië (Généralité de Bourgogne) 'n provinsie van Frankryk onder die Franse kroon geword terwyl die Graafskap van Boergondië die provinsie Franche-Comté, letterlik vry graafskap geword het.

Die hedendaagse administratiewe région van Boergondië kom grootliks ooreen met die voormalige Hertogdom van Boergondië.