Pous Eusebius

Pous Eusebius

Eusebius was die 31ste pous van die Rooms-Katolieke Kerk.

Biografie

Pous Eusebius is van Griekse afkoms, gebore in Cassano. Op 18 April 309 of 310 volg hy Pous Marcellus I op en regeer tot sy dood op 17 Augustus 309 of 310. Hy word opgevolg deur Pous Miltiades. Die naam ‘Eusebius’ (uit die Grieks euseves) beteken ‘vroom’.

Pontifikaat

Volgens die Liber Pontificalis was sy termyn slegs 4 maande lank, maar daar bestaan onsekerheid oor die presiese datums. Die besonderhede van sy pontifikaat het bekend geword deur sy grafskrif wat deur Pous Damasus aangebring is. ‘n Stuk van die oorspronklike en ‘n 6de eeuse kopie is deur De Rossi gevind in die Callixtus katakombe. Die grafskrif dui aan dat die stryery oor die hertoelating van die Christene wat hulle geloof versaak het tydens die vervolgings van keiser Diocletianus (die sg. “lapsi”), gedurende sy bewind voortgeduur het. Eusebius het die beleid wat reeds in 250 of 251 neergelê is, gehandhaaf, naamlik dat hulle hertoegelaat kon word na boetedoening. Hierdie siening is geopponeer deur Heraclius ‘n leier van die lapsi. Hierdie beroering het daartoe gelei dat keiser Maxentius beide Eusebius en Heraclius uit Rome verban het. Eusebius is na Sisilië verban waar hy dood is.

Verering

Pous Eusebius word as heilige en martelaar vereer in die Rooms-Katolieke Kerk. Sy feesdag is 17 Augustus ( voorheen 26 September).

Verwysings

Davis, R. (2001) Book of the Pontiffs (English Translation of the Liber Pontificalis) Liverpool University Press. ISBN 0-85323-545-7

Eksterne skakels

• BBKL Inskrywing (met Literatuurverwysings) in die Biographisch-Bibliographisches Kirchenlexikon (Duits)
• CE Inskrywing in die Catholic Encyclopedia (Engels)

Nota

Saamgestel uit die Nederlandse, Engelse, Duitse en Franse wiki’s.

Opvolging

Voorafgegaan deur Marcellus I

Biskop van Rome 309 – 310

Opgevolg deur Miltiades