Johann Rupert

Johann Peter Rupert (1 Junie 1950 - ) is die oudste seun van die afgestorwe Suid-Afrikaanse sakeman Anton Rupert en die voorsitter van die Switserse-gebaseerde luukse artikel maatskappy Richemont sowel as die Suid-Afrikaanse-gebaseerde maatskappye VenFin en Remgro.

Hy word groot in Stellenbosch, waar hy ook aan die Universiteit van Stellenbosch studeer maar nie sy studies voltooi nie. In 2004 het dié universiteit aan hom 'n eredoktorsgraad toegeken. Rupert en sy vrou Gaynor het drie kinders en woon in Somerset-Wes

Besigheidsloopbaan

Rupert dien sy besigheids vakleerlingskap in New York uit, waar hy twee jaar gewerk het vir Chase Manhattan en drie jaar vir Lazard Freres. Hy keer hierna terug na Suid-Afrika om die internasionale afdeling van die Rand Merchant Bank te lei voordat hy by die Rupert familiebesigheid begin werk het.

Sederdien het Johann al die Rupert familie se sakebelange oorgeneem. Johann Rupert, is nou die uitvoerende hoofbestuurder van Richemont en voorsitter van beide Remgro en VenFin.

Die Rupert familie se rykdom word in April 2006 volgens die finansiële webwerf www.fin24.com op VSA $1,7 miljard (sowat R10,4 miljard) geraam. Die 2005 uitgawe van die Forbes lys van die wêreld se rykste mense het die Rupertfamilie as no 272 geplaas met bates ter waarde van ongeveer VSA $2,3 miljard.

Ander belangstellings

Rupert is 'n voormalige krieketspeler en het gehelp om die Laureusstigting, te stig wat befondsing verskaf vir projekte wat ten doel het om minderbevoorregte kinders te motiveer deur deelname aan sport.

Hy is ook 'n stigterstrustee van die Nelson Mandela kinderfonds.

Net soos sy pa is hy ook verbind tot omgewingsbewaring.

Johann is ook ‘n kampvegter vir Afrikaans. Johann Rupert het besluit om miljoene rande se advertensies van sy Richemont, wat handelsname soos Alfred Dunhill, Cartier, Lancel en Van Cleef & Arpels besit te onttrek aan 'n internasionale dekortydskrif Wallpaper wat Afrikaans as "een van die lelikste tale ter wêreld" in die tydskrif se September 2005 uitgawe bestempel het.

Rupert het die besluit geneem nadat Wallpaper 'n onderskrif by 'n foto van die Afrikaanse Taalmonument soos volg verwoord het: "Die argitek Jan van Wijk se besonderse 1975-huldeblyk aan een van die wêreld se lelikste tale wat, as dit oor niks anders gewaardeer kan word nie, 'n goeie piekniekterrein is op pad na Franschhoek en Stellenbosch se wynlande".

Johann Rupert het as volg op die uitlating gereageer: "Die tydskrif het my moedertaal verneder en ek het nou genoeg daarvan gehad dat my kultuur voortdurend gekleineer word. Ek gaan nie net stilsit en toekyk hoe my taal en kultuur deur die modder gesleep word nie. Wat hulle oor Afrikaans te sê gehad het, is die grootste komp twak wat ek in 'n lang tyd gesien het en ek het besluit dit verg optrede."