Groot-Visrivier

Groot-Visrivier
Die Groot-Visrivier soos gesien in die Dubbeldrift natuurreservaat Die Groot-Visrivier soos gesien in die Dubbeldrift natuurreservaat
Oorsprong	Groot-Brak se oorsprong: Suid van die Oranje en Noordoos van Middelburg.
Stroomgebied	Suid-Afrika (Oos-Kaap)
Lengte	692 km
Oorspronghoogte	2 100 (Groot-Brak se oorsprong)
Mondinghoogte	0
Stroomgebiedopp.	30 800 km²

Die Groot-Visrivier (groot genoem om dit van die Visrivier in Namibië te onderskei) is 'n rivier wat deur die Oos-Kaapprovinsie van Suid-Afrika vloei. Die Portugese seevaarders het die rivier Rio de Infante gedoop en dit het as die Oub (Vis) bekend gestaan onder die plaaslike Khoikhoi.

Gedurende die 19de eeu het die rivier die grens van die Kaapkolonie gevorm en was die onderwerp van hewige gevegte tydens die Grensoorloë van 1779 tot 1878 tussen die inheemse Xhosanasie aan die een kant en die Hollandse boere en die 1820 Setlaars uit Engeland aan die anderkant. In 1835 is die Fingostam toegelaat om hulle op die rivier se oewer te vestig. Onder die Apartheidstelsel het die laer gedeeltes van die rivier die westelike grens van die tuisland van Ciskei gevorm.

Die rivier vloei in die algemeen die hele jaar lank op natuurlike wyse al is die oorsprong van die rivier in 'n droë gebied en die vloei kan redelik traag wees sonder die eb en vloei van die seegety. Water van die Oranjerivierstelsel kan egter nou gebruik word om die rivier se loop tydens droë tye aan te vul. In die 1970's het 'n groot projek water van die Oranjerivier, deur die Visrivier, vir landbou- en nywerheidsgebruik na die Oos-Kaap gebring. Die tonnel wat hiervoor gebou is was 'n reuse ingenieursonderneming. Die inlaat tot die tonnel is by Oviston ('n akroniem vir Oranje-Vis-Tonnel). Oviston is aan die oewer van die Gariepdam. Die rivier word gevoed deur die Groot-Brak-, die Tarka-, die Baviaans- en die Katriviere.

Cradock is 'n beduidende dorp waardeur die Visrivier loop. Die gebied tussen Port Elizabeth en die Visrivier staan bekend as die Sonskynkus.

Ondanks die rivier se naam vind visvang slegs in die dele naby die see plaas en is dit hoofsaaklik vir ontspanningsdoeleiendes. Die rivier is 'n getyrivier vir ongeveer 20km. 'n Gewilde kanobyeenkoms, die Visrivier Kanomaraton, vind jaarliks tussen Cradock en die riviermond plaas.