Gideon Joubert

Gideon Joubert (1923 - 27 Oktober 2010) was 'n Suid-Afrikaanse verslaggewer en skrywer.

Hy is gebore en het grootgeword op sy vader se wynplaas Sterhuis in die Bottelary, distrik Stellenbosch. Hy gaan skool aan die indertydse Hoër Jongensskool, tans die Paul Roos Gimnasium op Stellenbosch, waar wyle Paul Roos sy Latyn-onderwyser was. Hy verwerf die graad B.A. aan die Universiteit van Stellenbosch met hoofvakke Afrikaans-Nederlands, Sielkunde en Engels.

In sy eie woorde, "loop hy weg" in sy tweede jaar en sluit hom as dekjonge by 'n seilskip aan, waar hy bevorder word tot Gewone Seeman en Senior Gewone Seeman. 'n Jaar later keer hy terug om sy studies te voltooi.

In 1949 word hy verslaggewer by Die Burger, maar in 1951 sluit hy as offisier by die SA Vloot aan met die persoonlike opdrag van die indertydse Minister van Verdediging, mnr. Frans Erasmus, om die Vloot tweetalig te maak.

Gideon was een van die stigters van die Vlootgimnasium op Saldanha, waarvan hy later bevelvoerder word. Hy was stigter en voorsitter van die Vloottaalraad, en ook stigter en eerste bevelvoerder van die Duikskool. Suid-Afrika se eerste paddaman.

Ná sestien jaar bedank hy met die rang Kommandeur en keer hy terug na Die Burger, waar hy tot sy aftrede werk. Hy was een van die skrywers wat baie gereeld bygedra het tot die rubriek "Van Alle Kante" in Die Burger.

Joubert was 'n gerespekteerde wynkenner wat op toekenningspanele gedien het, en hy was ook die stigter van een van die oudste en wel gevestigde wynkringe in Suid-Afrika, die Heerengracht-wynkring.

Die jeugroman Spioenduiker Frans Alberts (1983) het uit sy pen verskyn. Dit was landswyd in skole voorgeskryf.

Die groot gedagte: abstrakte weefsel van die kosmos (1997) was die eerste boek oor die kosmologie wat in Afrikaans gepubliseer is en is met die 1998 Insig-prys vir nie-fiksie bekroon (die eerste keer dat hierdie prys toegeken word), sowel as met die 1998 Andrew Murray-prys vir geestelike literatuur. Die groot gedagte spreek aktuele en soms omstrede vraagstukke aan, soos byvoorbeeld die verband tussen die oerknalteorie en die Bybel. Die tiende hersiende uitgawe is in Augustus 2010 vrygestel.

Joubert het tot met sy sterfte in Heldervue, Somerset-Wes gewoon. Hy was gedurende hierdie tyd baie bedrywig in taal- en kultuurkringe, en was onder meer bestuurslid van die Vriende van Afrikaans asook die Helderbergse Kultuurraad. Hy was landswye koördineerder van die Vriende van Afrikaans. Hy was getroud en het vier seuns en vier kleinkinders gehad. Joubert het op 27 Oktober 2010 in Helderberg Village sag heengegaan.

Bibliografie

• Spioenduiker Frans Alberts (1983)
• Die groot gedagte: abstrakte weefsel van die kosmos (Tafelberg, 1997) ISBN 0624035433, ISBN 9780624035435