Foedji

Die berg Foedji teen sonsopkoms gesien vanaf die meer Kawagoetji

Foedji (富士山, Fuji-san^?, IFA: [ɸɯʥisaɴ]) , is teen 3 776 m die hoogste berg in Japan. Dit is 'n dormante vulkaan wat in 1707-08 laas uitgebars het. Dit is geleë op die grens van die Sjizoeoka en Jamanasji prefekture net wes van Tokio van waar dit op 'n helderlugdag gesien kan word. Dit is dus naby die Stille Oseaankus van sentrale Honsjoe geleë. Drie klein stede is om die berg geleë, naamlik: Gotemba (oos), Foedjijosjida (noord) en Foedjinomija (suidwes).

Die berg Foedji se buitengewoon simmetriese keël is 'n bekende simbool van Japan wat dikwels in kuns en fotografie uitgebeeld word, en gewild is onder toeriste en bergklimmers.