N9 (Suid-Afrika)

Die N9 is een van die nasionale paaie in Suid-Afrika. Die pad verbind George, Wes-Kaap met Colesberg. Die N9 loop min of meer noordoos/suidwes afhangende van watter rigting daar gereis word.

Begin van N9 Nasionale pad: Klein Karoo

Gesien van George begin die N9 as 'n afdraai uit die N12 net na die Outeniekwapas. Vir die eerste 70km hou die pad oos alvorens dit noordoos draai, oor die Potjiebergpas gaan en as 'n verbypad verby Uniondale gaan. Die pad gaan verder en net voor Gwarriepoort word die Oos-Kaap betree, dan volg Buyspoort en die pad is weereens 'n verbypad by Willowmore. Vir die volgende 19km kronkel die pad deur Perdepoort, gaan onderdeur die Beervleidam verby en betree die Groot Karoo.

Groot Karoo

In die Groot-Karoo is die volgende 70km lank en reguit alvorens die pad weer as 'n verbypad om Aberdeen gaan. Die volgende 55km na Graaf-Reinet is plat en reguit. Die N9 gaan deur Graaf-Reinet. Hier kan die reisiger gerus stop; die dorp bied vele besienswaardighede met 'n lang geskiedenis. Tegnies is die reisiger nou in die Kamdebo.

Noord van Graaf-Reinet

Die pad hou noordoos, en klim geleidelik. Na ongeveer 30km gaan die pad deur Naudebergpas gevolg deur Lootsbergpas. Hierdie pas is berig vir die feit dat hy gereeld in die winter toesneeu. Net voor die N9 Middelburg bereik sluit die N10 by die N9 aan. Dan is die reisiger by Middelburg; weereens 'n verbypad.

Middelburg en verder

Agtien kilometer na Middelburg skei die N10 en die N9 - net voor Carlton Hoogtes. Die N10 gaan noordwes en die N9 hou noodwaarts. Nog 18km verder en die N9 hou verby Noupoort en sluit 55km later by die N1 aan. Dit gebeur ongeveer 1km voor Colesberg. Die N9 het nou sy einde bereik.