Athene

Αθήνα (Athina) Athene
Kaart	Wapen
	Vlag
	Lêer:Flag of Athens.JPG
Land	Griekeland
Administratiewe gewes	Attica
Stigting	1000 v.C
Oppervlakte:
- Totaal	38.964 vk km
Hoogte bo seevlak	70-338 m
Bevolking:
- Totaal	745,514
- Bevolkingsdigtheid	19,133/vk km
Tydsone	Soos Griekeland
- Somertyd	Soos Griekeland
Amptelike webwerf	www.cityofathens.gr

Athene (Grieks: Αθήνα = Athina; foneties: /a'θina/) is die hoofstad en grootste stad van Griekeland, die hoofstad van die Attika gewes en die gelyknamige distrik (nomós) Athene. Athene is ook die politieke, kulturele en ekonomiese sentrum van die land, 'n kosmopolitiese metropool van ongeveer 4 000 000 inwoners. Athene is veral bekend vanweë antieke historiese geboue soos die Parthenon op die Akropolis ('n heuwel in Athene).

Die eerste moderne Olimpiese Spele vind in 1896 in Athene plaas. Eenhonderd en agt jaar later vind die Olimpiese Somerspele van 2004 weer in Athene plaas.

Naam

Die stad is vernoem na die godin Pallas Athene wat in die antieke tyd ook die beskermheilige van die stad was. Die Parthenon tempel op die Akropolis, die beroemdste monument in die stad, is ter ere van haar. Destyds is die stad Αθηναι (Athènai, meervoud van Athèna) genoem. In die 19de eeu word dit opnuut die offisiële naam van die stad. 'n Taalhervorming van die jare '70 sorg egter dat die stad nou Athina heet.

Geskiedenis

Vermoedelik vestig die eerste bewoners hulself ongeveer 3500 v.C. op die heuwel Akropolis. Van die vroeë geskiedenis van die stad is weinig bekend, maar Athene was waarskynlik tot circa 1065 'n koninkryk en 'n belangrike sentrum van die Miseense beskawing. In die opvolgende eeue word Athene stadig en met tydelike terugslae 'n demokrasie. In hierdie tydperk voer Athene verskeie oorloë teen Persië. Athene verslaan Persië by die Slag van Maraton, maar tien jaar later verwoes Persië grotendeels die Akropolis. Na verskeie pieke en dale (Peloponnesiese oorlog, Dertig Tiranne) word Athene in die 4de eeu v.C. 'n belangrike wetenskap- en kunsstad en lewer beroemde name soos Sokrates, Plato en Aristoteles.

In 168 v.C. val die Romeine die stad binne (en beskou die inval as 'n "bevryding"). Die stad hou aan om 'n belangrike rol in die Romeinse Ryk te vervul, al woon die Atheense burgers ongemaklik met die Romeinse teenwoordigheid saam. As straf hiervoor, laat Sulla die stad in 86 v.C. plunder. In 51 besoek die apostel Paulus die stad. Keiser Hadrianus lê om en by 130 'n besoek af en begin 'n reeks belangrike bouwerke. In hierdie tyd is Athene steeds 'n belangrike sentrum.

Hierna begin die stad te verval: in 297 en weer later in 395 plunder die Gote Athene. In 529 sluit keiser Justinianus die filosofieskole en sorg sodoende dat Athene 'n onbelangrike uithoek van die Bisantynse Ryk word. In 1024 word die stad deur Franse kruisvaarders verower en word vir 'n paar eeue lank 'n politieke speelbal vir verskeie state. In 1458 word die stad ingelyf deur die Turke. Uit respek vir die stad se verlede, verleen die Turke baie voorregte aan die burgers; tog omskep die Turke twee jaar later die Parthenon in 'n moskee. Die stad bly, met die uitsondering van 'n klein Venesiese besetting in 1687, byna vier eeue lank deel van die Ottomaanse Ryk.