Mokopane

Mokopane (Potgietersrus)
Mokopane (Potgietersrus)
Koördinate: 24°11′S 29°01′O
Land	Suid-Afrika
Provinsie	Limpopo
Distriksmunisipaliteit	Waterberg
Tydsone	UTC+2 (SAST)

Potgietersrus of Mokopane (voorheen Vredenburg, Pieter Potgietersrus en Potgietersrust) is 'n stad in die Limpopoprovinsie van Suid-Afrika. Die dorp is oorspronklik deur die Voortrekkers gestig en genoem na die Voortrekkerleier Piet Potgieter. Die naam is in 2003 na Mokopane verander, na die kaptein wat Piet Potgieter vermoor het. Dit is die tuiste van Noord-Ndebelesprekende stamme, asook Engels-, Afrikaans-, Noord-Sotho- en Tsonga-sprekendes.

Daar is vyf koninkryke in die omgewing: Kekana (Moshate), Langa (Mapela), Gegana (Mshade), Lebelo (Garasvlei) en Langa (Bakenburg). Die stad se naam sou eers na Mngombane verander word omdat dit die oorspronklike koning se naam was (en nie Mokopane nie).

Toerisme

Die stad is net twee uur se ry van Gauteng af en is dus die perfekte oornagplek vir reisigers op pad na Botswana, Zimbabwe en die Krugerwildtuin. Die gebied is tipies bosveld met baie akasiabome en aalwyne, wat in Junie en Julie op hulle mooiste is.

Ekonomie

Mokopane is een van Suid-Afrika se rykste landbougebiede en produseer koring, tabak, katoen, vleis, mielies, grondbone en sitrusvrugte. Die Zebediela-sitruslandgoed, 55 km na die suidooste, is een van die grootste sitrusplase in die Suidelike Halfrond.

Die gebied is ook ryk aan minerale, met die ontginning van platinum, diamante en graniet as hoofbedrywighede.