Valsbaai

Satellietfoto met Valsbaai (bo), Kaapstad (middel) en Tafelbaai (regs).

'n Ras-diskriminerende beperkingsbord op 'n strand in Muizenberg in Valsbaai, tydens apartheid. "Net blankes" — nie-blankes en honde was verbode.

Valsbaai (Engels: False Bay) is 'n baai met 'n lengte van sowat 48 kilometer naby Kaapstad, met Kaappunt en die Kaapse Skiereiland aan die westelike kant en die Hottentots-Holland-berge aan die oostekant.

Onder die vroeë Portugese seevaarders het Valsbaai as Golfo Dentro das Sierras of "Baai tussen die Berge" bekend gestaan. Baie skepe, wat van die Verre Ooste terugkeer, het die Kaap Hangklip aan die oostelike kant van die baai as Kaappunt aangesien en vaar dus die "vals baai" in. Gevolglik kry Kaap Hangklip vinnig die Portugese naam Cabo Falso ("Vals Kaap").

Die water in die baai het 'n matige temperatuur in vergelyking met strande langs die Atlantiese Oseaan wat deur die koue Benguelastroom beïnvloed word. Talle vissersdorpies en vakansieoorde het langs die kuslyn van Valsbaai ontwikkel, waaronder Vishoek, Muizenberg, Strand en Gordonsbaai. Simonstad is die hoofkwartier van die Suid-Afrikaanse Vloot.