Drakenstein Plaaslike Munisipaliteit

Drakenstein is 'n Wes-Kaapse plaaslike munisipaliteit wat geskep is ingevolge die munisipale bedeling van 2000 en waarvan die vernaamste dorpe die Paarl en Wellington in die Boland is. Dit val onder beheer van die Kaapse Wynlande-distriksmunisipaliteit.

Met 'n bevolking volgens die sensus van 2001 van 194 415 is Drakenstein die naasgrootste munisipaliteit in die provinsie. Die grootste bevolkingsgroep in daardie jaar was die bruines op 123 963, gevolg deur 41 509 swartes , 28 353 wittes en 590 Indiërs.

Die NG kerk op Wellington

Nedersettings

Nedersettings in die munisipaliteit sluit in:

• Gouda
• Paarl
• Wellington

Besienswaardighede

Die Paarl en Wellington is albei geskiedkundig belangrike dorpe van Suid-Afrika. Vele bekende Suid-Afrikaners is hier gebore of het 'n lang tyd hier gewoon. Op Wellington byvoorbeeld die digter Jan F.E. Cilliers, politikus genl. J.B.M. Hertzog skrywers Adam Small en Breyten Breytenbach, Voortrekkerleier Piet Retief, predikante di. Bernard Petrus Jacobus Marchand en George Stephanus Malan, Japie Hauptfleisch en die vegvlieënier Sailor Malan en in die Paarl Elsa Joubert, Chester Williams en Totius.

Onderwys

Drakenstein is een van die vernaamste opvoedkundige sentra in die land met roemryke skole soos die Hoër Meisieskool La Rochelle, Hoër Jongenskool Paarl, Paarl Gimnasium, Hoër Meisieskool Paarl (almal in die Paarl) en Hugenote-Hoërskool (op Wellington). Die Bolandse afdeling van die Skiereilandse Universiteit van Tegnologie en die Hugenote Kollege is ook op Wellington geleë.