Knysna

Knysna
Uitsig oor die dorp en die strandmeer
Knysna
Koördinate: 34°02′08″S 23°02′56″O
Land	Suid-Afrika
Provinsie	Wes-Kaap
Distriksmunisipaliteit	Eden
Plaaslike Munisipaliteit	Knysna
Tydsone	UTC+2 (SAST)

Knysna is 'n dorp in die Wes-Kaap, Suid-Afrika. Dit is 72 kilometer vanaf George en geleë tussen heuwels, langs die Knysna-strandmeer (Engels: lagoon). Volgens die munisipaliteit van Knysna is daar sowat 51 500 inwoners (2001). Die N2 nasionale pad gaan deur die dorp.

Geskiedenis

Die dorp is in 1804 gestig deur George Rex, na bewering 'n seun van koning George III van Engeland en Hanna Lightfoot, 'n lid van die Quaker-beweging. Die dorp ontstaan op Rex se plaas Melkhoutkraal. Hy lê die grondslag vir die plaaslike houtnywerheid en bou 'n seehawe. Goud is in 1876 by Millwood ontdek maar die stormloop was van korte duur.

Die vooraansig van die Holy Trinity-kerk, Belvidere, Knysna

Strandmeer

Die strandmeer is ryk aan seelewe onder andere garnale, krappe en ander skaaldiere. Die Knysnarivier mond uit in die strandmeer. Daar is twee natuurlike eilande in die strandmeer Thesen eiland en Leisure eiland. Thesen eiland was eers Paarden eiland genoem maar bekend geraak as Theseneiland toe die Thesen familie die eiland oorgeneem en 'n saagmeule daar bedryf het. Beide die eilande is met die land verbind nadat paaie na hul gebou is. Leisure eiland is 'n gesogte woonarea. Thesen eiland is ook ontwikkel en het ook 'n gesogte woonarea geraak.
Die Nasionale Knysnameergebied is in 1985 geproklameer en onder die beheer van die Nasionale Parkeraad geplaas. Die beskermde gebied beslaan ongeveer 15 000 ha. Dit is gedoen om 'n balans te tref tussen ontwikkeling en bewaring van die natuurlike hulpbronne.

Houtnywerheid

Knysna is vandag 'n sentrum van die houtverwerking met meubels en bote as die vernaamste produkte. Knysna word omring deur natuurlike inheemse woude, bekend as die Knysnabos. Die Thesen en Parkes families het 'n groot rol gespeel in die ontwikkeling van die houtnywerheid nadat beide families saagmeulens gebou het; Thesen's op Paarden eiland en Parkes in die dorp. Nadat Parkes hul saagmeule geskuif het is die area ontwikkel tot Woodmill Lane - 'n winkelsentrum. Daar is tans 30 000 ha denne- en bloekomboom plantasies in die distrik.

Strande

Daar is ook etlike strande in die omgewing. Die strandmeer sluit aan by die see tussen twee kranse wat "die Koppe" genoem word en vorm 'n beeldskone natuurprag. Die naaste strand is by Brenton-on-Sea terwyl die Buffelsbaai strand ook baie bekend is.

Oesterkwekery

In die Knysna-strandmeer word die bekende Knysna oester gevind maar die oesters wat gekweek word is 'n Stille Oseaan spesie (Crassostrea gigas). Diè spesie bereik volwassenheid in slegs ses maande terwyl die inheemse oesters (Striostrea margaritacea), ook bekend as die Kaapse oester, 3 jaar neem om volwassenheid te bereik. Daar is ongeveer 6ha se oesterbeddings in die strandmeer.

Visvang

Daar is bykans 200 spesies vis in die strandmeer; visvang is uiters gewild onder Suid-Afrikaanse hengelaars. Bekende spesies wat gevang kan word is: kabeljou, stompneus, steenbras, knorhaan terwyl galjoen vanaf die strande en rotse gevang kan word. Die Reuse-modderkrap kom ook voor in sekere gebiede in die strandmeer terwyl die Moddergarnaal in feitlik die hele strandmeer voorkom.

Inheemse diere

Die Knysnaseeperdjie is inheems en word beskerm. Die bosse naby Knysna word van oudsher bewoon deur 'n inheemse olifanttrop en deur die Knysnaloerie; 'n klein papegaaiagtige voël.

Oesterfees

Gedurende die eerste week van Julie vind die jaarlikse Oesterfees plaas. Die Suid-Afrikaanse Vloot neem ook gewoonlik deel aan die verigtinge. Fregatte anker by die plaaslike hawe in die dorp. Die Bosmarathon, padfiets en bergfiets wedrenne is ook deel van die fees.

Sport

Die dorp beskik oor drie golfbane en verskeie sportklubs bv. rugby, padwedlopers en kanoe-klub. Die jaarlikse Karoo-tot-Kus Bergfiets Wedren eindig ook in Knysna gedurende September.

Sien ook

• Ongewenste Vreemdeling, rolprent wat hier verfilm is.