Huis (astrologie)

’n Kaart van die ontstaan van astrologie.

Die huise in astrologie is die twaalfvoudige verdeling van die horoskoop wat betrekking het op die verskillende lewensterreine. Die stand van ’n planeet weerspieël hiervolgens op watter gebied die planeet werksaam is. Daar is verskeie huisstelsels in gebruik, waarvan dié van Placidus die gewildste is.

Ooreenstemming met die sterretekens

Die indeling van die horoskoop in huise het op dieselfde wyse ontstaan as die indeling van die 12 tekens van die diereriem:

1. Sterretekens: Binne ’n jaar volg die son ’n skynbare baan al met die 12 tekens van die diereriem langs. Hieruit het die vierdelige verdeling ontstaan op die basis van die volgende kardinale punte: die twee nagewenings en die twee sonkeerpunte wat die begin van die 4 seisoene aandui: Ram op 0 grade vir die lente (in die Noordelike Halfrond), die lentepunt genoem, Kreef op 90 grade vanaf die lentepunt vir die somer, Weegskaal op 180 grade vir die herfs en Steenbok op 270 grade vir die winter. Elke kwadrant dek 3 maande.
2. Huise: Binne ’n dag (24 uur) kom die son op, is hy op sy hoogste punt, gaan hy onder en is hy op sy laagste punt. Hierdie 4 punte dui die 4 belangrikste punte van die 12 huise aan: die Asendent (ASC, sonsopkoms), die Medium Coeli (MC, hoogste punt in die middag), die Desendent (DESC, die sonsondergang) en die Imum Coeli (IC, laagste punt).

Huis 1 = ASC = die Asendent

Huis 4 = IC = Imum Coeli

Huis 7 = DESC = die Desendent

Huis 10 = MC = Medium Coeli

So het dus ook 4 kwadrante ontstaan wat eweneens opgedeel word in 3 huise elk, en so het die 12 huise ontstaan.

Die 12 huise

Die Latynse name van die huise met hul vertaling, verwante sterretekens, asook die betekenisse en tradisionele assosiasies.

Huis	Teken	Latyn	Vertaling	Moderne naam	Interpretasie
1ste	Aries	Vita	Lewe	Huis van die Self	Fisieke verskyning, karaktertrekke, eerste indrukke, algemene ingesteldheid teenoor die wêreld, ego. ’n Begin, initiatief.
2de	Taurus	Lucrum	Weelde	Huis van Waarde	Materiële en niemateriële dinge van waarde, geld, besittings, eiendom, oes, selfwaardering.
3de	Gemini	Fratres	Broers	Huis van Kommunikasie	Laer opleiding en vroegste omgewing, geestelike vermoëns, broers en susters, die buurt, kort reise en verplasings.
4de	Cancer	Genitor	Ouer(s)	Huis van Gesin en Familie	Voorouers, erfenis, wortels, die moeder of moederfigure, sorg vir die huishouding, die uiteindelike afloop van sake.
5de	Leo	Nati	Kinders	Huis van Plesier	Ontspanning, plesierige dinge, spel en dobbel, kinders, liefdesverhoudings, seks, kreatiewe selfuitdrukking.
6de	Virgo	Valetudo	Gesondheid	Huis van Gesondheid	Roetine, pligte, vaardighede of opleiding, werk, gesondheid en gevoel van welsyn, diensbaarheid aan ander, sorgsaamheid, huisdiere en ander klein diere.
7de	Libra	Uxor	Eggenote	Huis van Lewensmaats	Hegte, vertroulike verhoudings van alle soorte, huweliks- en sakevennote, ooreenkomste en kontrakte, diplomatieke sake, openlike vyande, die karaktertrekke wat ons soek in lewensmaats.
8ste	Scorpio	Mors	Dood	Huis van Reïnkarnasie	Siklusse van die dood en wedergeboorte, seksuele verhoudings, diepgevoelde verhoudings van alle soorte, gesamentlike beleggings en finansiering, die okkulte, die psigiese, taboes, selftransformasie.
9de	Sagittarius	Iter	Reise	Huis van Filosofie	Lang reise na die buiteland, kultuur, godsdiens, wette en etiek, hoër opleiding, kennis, ervaring deur ontwikkeling.
10de	Capricornus	Regnum	Koninkryk	Huis van Sosiale Status	Ambisies, motiverings, loopbaan, status in die maatskappy, regering, outoriteit, die vader of vaderfiguur, die broodwinner, iemand se openbare verskyning of die indruk wat hy wek.
11de	Aquarius	Benefacta	Vriendskap	Huis van Vriendskappe	Vriende en kennisse, geesgenote, groepe, klubs en verenigings, voordele en rykdom uit ’n loopbaan, iemand se hope en wense.
12de	Pisces	Carcer	Gevangenis	Huis van Verlies van die Self	Mistisisme, afgesonderde plekke soos hospitale en gevangenisse, vir jouself verborge dinge wat vir ander wel duidelik is, ontwyking, geheimhouding, terugtrekking, oordenking en selfopoffering, die onbewuste, onbekende vyande.

Verwysings

Hierdie artikel is merendeels vertaal vanaf die Nederlandse Wikipedia-artikel [1]