Durban

Durban
Kaart	Wapen
	Vlag
Land	Suid-Afrika
Administratiewe gewes	KwaZulu-Natal
Koördinate	29°53′S 31°03′O
Stigting	1835
Metropolitaanse Munisipaliteit	eThekwini
Oppervlakte:
- Totaal	2 291,8 vk km
Bevolking:
- Totaal (2005)	3 468 086
- Bevolkingsdigtheid	1 513/vk km
Etniese groepe:
- Swart	68%
- Indiër	19,9%
- Blank	8,98%
Tydsone	SAST / UTC +2
- Somertyd	Geen
Klimaat	Subtropiese klimaat
- Jaarlikse gemiddeld	20.5 °C
- Jaarlikse maksimum	28 °C
- Maksimum Januarie / Julie	27 / 22 °C
- Jaarlikse minimum	11 °C
- Minimum Januarie / Julie	21 / 11 °C
Gemid. jaarlikse neerslae	1003 mm

Durban is 'n stad in KwaZoeloe-Natal, Suid-Afrika met ongeveer 4 miljoen inwoners uit 'n diverse groep kulture. Dit is 'n gewilde vakansiebestemming weens goeie weer en die warm Mosambiekse seestroom. Suid-Afrika se besigste hawe is by Durban wat een van die wêreld se diepste natuurlike hawens is.

Geskiedenis

Durban se natuurlike hawe, wat deur die Zoeloes Thekwini ("Strandmeer") genoem word, is op 25 Desember 1497 deur die Portugese seevaarder Vasco da Gama besoek. Hy noem die plek Rio de Natal of "Kersfeesrivier". Later is die naam gewysig na Port Natal.

Port Natal bly drie eeue lank 'n toevlugsoord vir skipbreukeling-seemans, slawe- en ander handelaars. Die eerste blywende nedersetting word in 1823 deur Britse setlaars gestig. Die stad groei vinnig en word in 1835 ter ere van die destydse goewerneur van die Kaap, sir Benjamin D'Urban, vernoem. In 1843 verklaar die Britte die stad tot 'n kolonie. In die laat 19de eeu kom duisende Indiese landarbeiders na die besige hawe- en handelstad, en hulle nakomelinge vorm vandag die belangrike Indiese element van die plaaslike bevolking. Tydens sy verblyf in Suid-Afrika tussen 1893 en 1915 werk die Indiese politikus Mahatma Gandhi vir 'n lang tydperk as 'n advokaat in Durban.

Klimaat

Durban is bekend vir sy gematigde, sonnige winterklimaat. Die stad het 'n oorvloed aan vegetasie en 'n subtropiese klimaat met sonskyn vir ten minste 320 dae per jaar. Gedurende die wintermaande van Junie, Julie en Augustus bly temperature tussen 16 °C en 25 °C en in die somer kan temperature 32 °C bereik met relatief hoë humiditeit. Durban se klimaat word deur die ewenaarstroom van die Indiese Oseaan voortgebring, wat 'n bron van warm, helderblou water is wat suidwes deur die Mosambiek-kanaal vloei. Seewatertemperature aan die kus vergelyk meer gunstig met dié van die Mediterreense gebied in die somer (gemiddeld 24 °C), maar in die winter val die kwik selde onder 19 °C — Durban is sodoende 10 °C warmer as die Mediterreense gebied in dieselfde seisoen.

Kultuur

Die stadshorison van Durban

Musiek

Rockmusiek

Aangesien Durban 'n hoofsaaklik Engelssprekende streek is, is daar talle wit rockgroepe wat invloede vanuit die Verenigde State en Europa trek, nes vele ander groepe in die res van die land. Urban Creep was baanbrekers in die invoeging van die sogenaamde "Durban-gevoel" in hul musiek. In die afgelope jare het rockgroepe hul musiek professioneel begin produseer, wat tot die voortbrenging van vele ateljeevervaardigde gehaltealbums gelei het.

Infrastruktuur

Die stad beskik oor 'n internasionale lughawe terwyl daar ook spoorverbinding met Gauteng is. Die stad is ook verbind met Port Elizabeth en die Noordkus met die N2 nasionale pad terwyl die N3 nasionale pad hier begin en in Johannesburg eindig. Die twee nasionale paaie kruis mekaar by die EB Cloete wisselaar in Westville.

Susterstede

• Alexandrië, Egipte
• Antwerpen, België
• Bakoe, Azerbeidjan
• Bremen, Vrye Hansestad Bremen, Duitsland
• Bulawayo, Zimbabwe
• Chicago, Illinois, Verenigde State
• Daejeon, Suid-Korea
• Eilat, Israel
• Kaohsiung, Taiwan
• Kwangtsjou, Sjina
• Leeds, Verenigde Koninkryk
• Le Port, Réunion, Frankryk
• Maracaibo, Venezuela
• Nantes, Frankryk
• New Orleans, Louisiana, Verenigde State
• Oran, Algerië
• Rio de Janeiro, Brasilië
• Rotterdam, Nederland

Sien ook

• NG gemeente Durban

Eksterne skakels

• Amptelike webwerf (en)