Poensjak Djaia

Poensjak Djaia
Die piek van Poensjak Djaia in Nieu-Guinee
Ligging	Nieu-Guinee, Indonesië
Hoogte	4 884 meter bo seevlak
Reeks	Soedirmangebergte
Koördinate	04°05′24.6″S 137°11′06″O
Bergtipe	Bergkam
Eerste bestyging	13 Februarie 1962
Eerste bestyger(s)	Heinrich Harrer
Maklikste roete	Bergklim

Poensjak Djaia (of Carstenszpiramide) is 'n berg in die Soedirmangebergte in die wes-sentrale hooglande van Papoea-provinsie, Indonesië (in die Punsjak Djaia-regentskap). Ander name sluit in Nemangkawhi in die Amoengkal-taal, Ngga Poeloe en Goenoeng Soekarno.

Met 'n hoogte van 4 884 m bo seevlak is Poensjak Djaia die hoogste berg in Indonesië, die hoogste op die eiland Nieu-Guinee (wat die Indonesiese Papoea-provinsies en Papoea-Nieu-Guinee omvat), die hoogste van Oseanië (Australië), en die 5de hoogste berg in die politiese streek Suidoos-Asië. Dit is ook die hoogste punt tussen die Himalajas en die Andes, en die hoogste eilandpiek ter wêreld. Sekere bronne gee Wilhelmberg van 4 509 m aan as die hoogste bergpiek in Oseanië, deurdat Indonesië as deel van Asië beskou word (Suidoos-Asië).

Geskiedenis

Die hooglande om die piek was reeds voor Europese kontak bewoonde gebied, en die piek was in Amoengkal bekend as Nemangkawhi. Punsjak Djaia is "Carstenszpiramide" genoem na die Nederlandse ontdekkingsreisiger Jan Carstensz wat op 'n helder dag in 1623 die bergpiek se gletsers vir die eerste keer opgemerk het. Die waarneming sou vir meer as twee eeue onbevestig bly, en in Europa is met Carstensz gekorswil oor die sneeu wat hy by die ewenaar sou gesien het. Hierdie naam word steeds deur bergklimmers gebesig. Alhoewel die sneeuveld om Punsjak Djaia so vroeg as 1909 deur die Nederlandse ontdekkingsreisiger, Hendrik Albert Lorentz betree is met ses van sy inheemse Dajak Kenjah portiers wat hy by die Apo Kajan in Borneo gewerf het. Die piek is nie voor 1962 bestyg nie, en wel deur 'n ekspedisie gelei deur die Oostenrykse bergklimmer Heinrich Harrer (van Sewe Jaar in Tibet-faam, en klimmer van die Eiger se noordaansig) met drie ander ekspedisielede — Philip Temple, Russell Kippax en Bert Huizenga. Temple, van Nieu-Seeland, het voorheen 'n ekspedisie na die area gelei, en 'n toegangsroete na die berge gebaan.

Toe Indonesië in die 1960's beheer van die provinsie verkry, is die piek hernoem na 'Punsjak Soekarno' of Soekarno-piek, na die eerste president van Indonesië; later is dit verander na Punsjak Djaia, waar Poensjak 'piek' of 'berg' beteken, en Djaia 'oorwinning', 'seëvierend' of 'glorieryk'.