Seweweekspoort

Seweweekspoort
Ligging	Tussen Laingsburg en Calitzdorp
Maksimumhelling	1:14
Hoogte	1 018 m
Lengte	17 km
Begin in	1850’s
Voltooi in	1862

Seweweekspoort lê op ’n verbindingspad tussen die N1 by Laingsburg in die Groot Karoo en die R62 naby Calitzdorp en Ladismith in die Klein Karoo. Die pad gaan by die voormalige sendingstasie Amaliënstein noordwaarts deur ’n poort van 17km wat deur die Seweweekspoortrivier (ook Huisriver genoem) in die Klein Swartberge gevorm is. Op 1 018m bereik die poort sy hoogste punt. Die maksimum helling is 1:14.

Die pad kruis die loop van hierdie westelike tak van die Gamkarivier 30 maal. Daarom is die poort tydens en na reën dikwels onbegaanbaar. Toerisme vorm die grootste verkeer op die roete weens die besondere ongerepte natuurskoon.

Naam

Verskeie teorieë bestaan oor die oorsprong van die naam vir die poort. Die aanneemlikste is dat dit vernoem is na eerw. Louis Zerwick van die Berlynse Sendinggenootskap en waarskynlik werksaam was by Amaliënstein en Zoar. In die volksmond het Zerwickspoort deur die jare heen Seweweekspoort geword, want die bevolking het die seweweeksvaring geken.

Geskiedenis

In die 1850's is daar met behulp van gevangene-arbeid begin om die pad langs die rivierloop te bou. Na weinig vordering is die taak in 1860 aan A.G. de Smidt, swaer van Thomas Bain opgedra. Die pad is in November 1862 voltooi en is steeds in gebruik.

Trivia

Seweweekspoortpiek (2325 m), 24km van Ladismith, is die hoogste piek in die Wes-Kaap.

Sien ook

• Lys van bergpasse in Suid-Afrika

Bibliografie

• Die Burger, 11 Mei 1973
• Erasmus, B.P.J.: Op Pad in Suid-Afrika. Jeppestwon: Ball, 2010. ISBN 978-1-86842-149-7
• Ross, Graham: The romance of Cape mountain passes. Kaapstad: Sunbird, 2011. ISBN 978-1-920289-51-5
• Standard Encyclopaedia of Southern Africa, deel 9. Kaapstad: Nasou, 1973. ISBN 0-625-00325-X