Vestmannaeyjar

Die dorp Heimaey op die gelyknamige eiland

Die Vestmannaeyjar (letterlik "Wesman-eilande", 'n verwysing na vroeë Keltiese setlaars van die Britse Eilande) is 'n eilandgroep van vulkaniese oorsprong suid van Ysland. Die eilandreeks bestaan uit 14 eilande, 30 "skere" of rotsagtige eilandjies en 30 rotse.

Nedersettings

Die eiland Heimaey met die gelyknamige dorp met 4 027 inwoners (Oktober 2007) is die enigste bewoonde eiland. Vestmannaeyjar se ekonomie is hoofsaaklik gebaseer op vissery en toerisme.

Die geboorte van die vulkaan Eldfell

Op 23 Januarie 1973, om 01:55 die oggend, is die vulkaan Eldfell gebore naby die Vestmannaeyjar. Die Heimaey se hele bevolking is ontruim na die hoofland deur 50 tot 60 vissersbootjies. 300 bejaardes en gestremdes is na Reykjavík ontruim deur vliegtuig en helikopter. Verskeie internasionale organisasies het hand bygesit om die dorp te red. Die hawe, een van die belangrikste in Ysland, was van groot belang en is amper vernietig deur die aankomende lawa. Die vulkaniese ontploffing het vir vyf maande en tien dae aangehou en sy einde is verklaar op 3 Julie 1973.