Ereboogvoël

Ereboogvoëls
Die satynblou-ereboogvoël (bo) en sy laning (onder)
Wetenskaplike klassifikasie
Koninkryk:	Animalia
Filum:	Chordata
Klas:	Aves
Orde:	Passeriformes
Suborde:	Passeri
Familie:	Ptilonorhynchidae G.R. Gray, 1841
Genera
Ailuroedus Amblyornis Chlamydera Prionodura Ptilonorhynchus Scenopooetes Sericulus

Ereboogvoëls (familie Ptilonorhynchidae) is 'n voëlfamilie wat uit kraai-agtige sangvoëls bestaan. Hierdie voëls kom slegs in Australië, Nieu-Guinee en 'n paar geïsoleerde eilande voor en is verwant aan die flambojante paradysvoëls. Die naam "ereboogvoël" dui op die familie se bekendste kenmerk: mannetjies bou ingewikkelde konstruksies wat hulle in stand hou en versier, waarheen hulle vroutjies probeer lok om haar die hof te maak. Die konstruksie en sy dekorasie is sodanig dat die eerste Europese natuurkundige wat een ontdek het, oortuig was dat dit deur 'n mens gebou was.

Alhoewel sommige ereboogvoëls helderkleurig is, is ander baie vaal. Ook hulle konstruksies wissel van hutvormig, tot oordekte lanings, tot torings. Helderkleurige mannetjies gebruik hulle helder veredosse om die vroutjies te beïndruk en hul konstruksies is taamlik eenvoudig; dis die vaal mannetjies wat weer indrukwekkende konstruksies bou en dan ryklik versier met kleurvolle voorwerpe.

Die bouer van hierdie konstruksie het ook gebruik gemaak van weggegooide rekkies en ander mensgemaakte voorwerpe

Verskillende voëls verkies verskillende voorwerpe, skulpe, blare, blomme, vere, klippe, bessies, goggas en selfs mensgemaakte voorwerpe soos plastiekdoppies, munte, skroewe, ens. word gebruik. Gekleurde mannetjies kies gewoonlik voorwerpe met 'n soortgelyke kleur. Die bekendste voorbeeld is waarskynlik die satynblou-ereboogvoël, wat sy konstruksie met 'n verskeidenheid blou/pers voorwerpe versier. Die bouer van die ingewikkeldste konstruksie is ook die skaarste: die Vogelkop-ereboogvoël. Hulle is die vaalste voëltjies in die familie en bou hutte met 'n voorperk waar hulle hopies helderkleurige voorwerpe versamel.

Hierdie konstruksies wat die mannetjies bou is egter nie die voëls se nes nie: alhoewel die mannetjie soveel moeite doen om 'n vroutjie te lok, speel hy geen rol in die versorging van die kuikens nie. Die vroutjie bou self die nes en, na sy met 'n mannetjie gepaar het, sien sy hom gewoonlik nie weer nie.

Eksterne skakels

• Video's van die Vogelkop-ereboogvoël en sy nes: [1] [2].