1820-Setlaars

Die Britse setlaars van 1820 land in Algoabaai", deur Thomas Baines, 1853.

'n Satiriese uitbeelding van die 1820-setlaars, wat emigrante waarsku oor wat op hulle wag.

1820-Setlaars is die historiese term vir die sowat 5 000 blanke Britse immigrante wat hulle in die tydperk tussen April en Junie 1820 in die Oos-Kaap gevestig het. Die setlaars uit Engeland, waaronder ook 'n aantal adellikes, is deur die Britse regering en die koloniale owerhede van die Provinsie van die Kaap die Goeie Hoop aangemoedig om in Suid-Afrika 'n nuwe tuiste te vind, maar in wese is dit 'n poging om die anglofone element van die Suid-Afrikaanse bevolking te versterk en veral die grensgebied van die Oos-Kaap deur middel van 'n groter blanke bevolking teen aanvalle van die Xhosa-stamme te verdedig.

Die setlaars kom in sowat 60 groepe in Suid-Afrika aan, waar hulle van uitrusting en plase in die omgewing van die dorp Bathurst voorsien is. Weens hulle gebrek aan landboukundige kennis en onder die indruk van die guerilla-taktiek van die Xhosa-krygers in die grensgebied verlaat 'n groot aantal van die setlaars die plase en vestig hulle as handelaars in Bathurst, Grahamstad, Oos-Londen en Port Elizabeth. Die Settlers' Cemetery van Port Elizabeth is die begraafplaas van baie van die 1820-Setlaars.

Bronne

• Mitford-Barberton, I., 1968. Some Frontier Families, Kaapstad: Human & Rousseau
• Rosenthal, Eric, 1978. Encyclopaedia of Southern Africa, Kaapstad: Juta & Co.

Sien ook

• Geskiedenis van die Kaapkolonie vanaf 1806 tot 1870

Eksterne skakels

• Grahamstad-stigting en Nasionale Monument van die 1820-Setlaars
• Vereniging van die 1820-Setlaars