Flikkerlig

Voertuig met sy linkerflikkerlig aangeskakel.

'n Flikkerlig, ook rigtingwyser en rigtingflikker, is 'n lig op 'n voertuig wat gebruik word om ander padgebruikers te waarsku dat 'n voertuig na links of regs gaan draai. Die flikkerlig is gewoonlik vooraan wit of oranjegeel, terwyl dit agter rooi of oranjegeel is. Aan die sykante moet rigtingwysers oranjegeel flikker. Op die paneel se instrumentegroep van die motor moet die flikkerwaarskuliggies gelyktydig met die flikkerligte buite saamval. Daar is ook meestal klankterugvoer betrokke: as die flitse of klank skielik vinniger as gewoonlik is, dan dui dit op 'n fout van een of meer lampe.

'n Agtereenvolgende voertuig wat in Suid-Afrika sy regterflikkerlig aanskakel, is 'n teken dat hy die motor voor hom gaan verbysteek. Wanneer flikkerligte tegelyk links en regs flikker, is dit 'n waarskuwingsteken. Sou aankomende verkeer aan die regterbaan opeens hul waarskuwingsligte flikker mag dit soms (hoewel onwettig) dui op 'n spoedlokval, ongeluk, verkeersknoop, loslopende diere op die pad vorentoe of 'n fout. 'n Verbystekende motor wat sy waarskuwingsligte flikker kan ook 'n teken van dankbetuiging wees.

As 'n motor langs die pad onklaar geraak en tot stilstand kom, word die waarskuwingsligte gebruik.

Flikkerligte in verkeerssirkels

In Suid-Afrika word flikkerligte as volg in verkeerssirkels gebruik:

Links draai

Motors wat wil links draai, moet links flikker en die sirkel in die linkerbaan benader. Binne die sirkel hou hierdie motors links en hou hulle aan links flikker totdat hulle die verkeerssirkel verlaat het.

Reguit aanhou

Motors wat reguit wil aanhou kan in enige toepaslike baan die verkeersirkel benader. Indien daar geen padmerke is nie, is dit beter om links te hou. Motors wat wil reguit aanhou moet links flikker sodra hulle die laaste uitgang verbygesteek het voor die uitgang wat hulle wil neem.

Regs draai

Motors wat wil regs draai, moet regs flikker en die sirkel in die regterbaan benader. Hierdie motors moet regs hou binne die sirkel totdat hulle bane moet verwissel om die uitgang te neem. Motors wat wil regs draai moet ook links flikker sodra hulle die laaste uitgang verbygesteek het voor die uitgang wat hulle wil neem.