Bridgetown, Barbados

Bridgetown
Kaart	Wapen
	Vlag
Land	Barbados
Eiland	Barbados
Koördinate	13°05′N 59°36′W
Gestig op	5 Julie 1628
Oppervlakte:
- Totaal	38,8 vk km
Hoogte bo seevlak	1 m
Bevolking:
- Totaal (2014)	110 000
- Bevolkingsdigtheid	2 800/vk km
- Metropolitaanse gebied
Tydsone	UTC-04:00
Burgemeester

Bridgetown is die hoofstad, grootste stad en vernaamste hawe van Barbados, 'n eilandnasie in die Karibiese See. Die stad het in 2014 'n geskatte bevolking van 110 000 gehad met 'n bevolkingsdigtheid van 2 800/vk km. Die stad is op 5 Julie 1628 deur Britte onder Charles Wolverstone gestig. Die historiese middestad van Bridgetown is in 2011 deur Unesco as wêrelderfenisgebied gelys.

Ekonomie

Bridgetown is 'n belangrike finansiële sentrum vir Wes-Indië. Talle belangrike banke is in dié hawestad gevestig. Dit is ook die ligging van die Barbados Stock Exchange, een van die belangrikste aandelebeurse in die Karibiese gebied. Verder speel toerisme 'n belangrike rol in die ekonomie en word rum, suiker en melasse geproduseer.

Geskiedenis

Bridgetown is in 1628 as 'n Britse kolonie met die naam Town of Saint Michael (dorp van St.-Michael) gestig. Voor dit was die gebied waarskynlik deur Arowak-indiane bewoon, maar hulle was teen daai tyd nie meer daar nie. Die Europeërs het wel 'n primitiewe brug wat oor die rivier gebou is gevind. Die stad is in die omgewing van hierdie brug gebou, vanwaar die plek die bynaam Bridgetown gekry het. Ná verloop van tyd het hierdie bynaam die stad se amptelike naam geword.

Van 1800 tot 1885 was Bridgetown die hoofstad van die Britse Bowindse Eilande. In 1966 het Barbados onafhanklik geword en in 2021 'n republiek.

Tydens die Krieketwêreldbeker 2007 is Bridgetown se Kensington-ovaal vir sewe wedstryde, waaronder die eindstryd, ingespan. Tydens die T20I-wêreldbeker 2010 is hier elf wedstryde, waaronder die eindstryd, aangebied.

Eksterne skakels

• Wikimedia Commons het meer media in die kategorie Bridgetown, Barbados.
• (en) (fr) Amptelike Unesco-bladsy