Döhne-merino

Die Döhne-merino is 'n Suid-Afrikaanse skaapras wat ontwikkel het uit 'n kruising van Duitse vleismerinoramme en Peppin-merino-ooie. So het 'n skaap ontstaan wat ideaal geskik is vir die produksie van sowel goeie wol as vleis.

J.J.J. Kotze was die eerste direkteur van die Landbounavorsingsinstituut Döhne by Döhne naby Stutterheim en hy het besef dat 'n skaapras nodig is wat goed sal aard in die Suurveld van die Oos-Kaap en het daarom in 1939 met daardie doel met kruisteling van skape begin.

Meer as 30 000 opregte Döhne-merino-ooie is by die stoettelersvereniging geregistreer en die meerderheid skape kom voor op plase in die Oos- en Wes-Kaap en die Vrystaat. Sedert 1998 word ook in Australië met die Döhne-merino geboer. Volwasse ooie weeg oor 'n 50 kg en ramme oor 'n 80 kg en lewer 'n 4 kg wol per jaar.

Bibliografie

• afr.studbreeder.com
• McMaster, Cameron: The Dohne Merinos as a practical example of successful adaptation to environmental and economic factors. www.merino2014.com
• Snyman, M.A.: South African sheep breeds: Dohne Merino sheep. Info-pack ref. 2014/015. Grootfontein Landbounavorsingsinstituut. gadi.agric.za
• www.dohnemerino.org