Geloftedag

Uitbeelding van Cilliers se voordrag van die gelofte in die rolprent Bou van ’n Nasie.

Plakket by die Bloedrivier-monument met Die Gelofte daarop.

Geloftedag was 'n openbare vakansiedag in Suid-Afrika wat jaarliks op 16 Desember gedenk is. Hoewel dit nou amptelik Versoeningsdag heet, vier party Afrikaners dit steeds as Geloftedag.

Geloftedag

Op 16 Desember 1838 is 470 Voortrekkers deur ten minste 10 000 Zoeloes, georganiseer in verskeie 'impi's', by Bloedrivier aangeval. In die daaropvolgende oorwinning is net een Voortrekker lig beseer – hul leier, Andries Pretorius. Op die voorafgaande paar dae het die Voortrekkers daagliks 'n gelofte afgelê dat indien God hulle sou help, sou hulle en hulle nageslag daardie dag soos 'n Sabbatdag herdenk, en die eer van die oorwinning sal aan God gegee word. Die slag staan bekend as die Slag van Bloedrivier.

'n Sonstraal val elke jaar op 16 Desember op die granietsenotaaf in die Voortrekkermonument in Pretoria. In 2019 het 'n rekordgetal Afrikaners geloftedagvieringe by die Voortrekkermonument in Pretoria bygewoon.

Oorgang na Versoeningsdag

Die hoofartikel vir hierdie afdeling is: Versoeningsdag.

In 1994 het die eerste ANC-regering die dag met Versoeningsdag vervang om versoening oor kultuur- en kleurgrense te bevorder. Party Afrikaners vier egter steeds Geloftedag in die gees van die Gelofte. Daarteenoor onthou swartmense die dag eerder as die dag waarop uMkhonto we Sizwe sy eerste aanvalle in 1961 uitgevoer het.

Sien ook

• Die Gelofte
• Lys van ander Geloftes in hedendaagse Suid-Afrika
• Slag van Bloedrivier
• Lys van openbare vakansiedae in Suid-Afrika

Bibliografie

• Swart, Marius J.: Geloftedag. Kaapstad: H.A.U.M., s.j.
• van Jaarsveld, F.A.: Prof. Van Jaarsveld stel standpunt oor 16 Des. Die Burger, 3 Julie 1979.

Eksterne Skakels

• Amptelike webwerf van die Bloedrivier Gelofteherdenkingskomitee, Bloedrivier Geloftekomitee.