Georges Bizet

in Wikipedia, die vrye ensiklopedie
Georges Bizet
Georges Bizet in 1875
Agtergrondinligting
GeboortenaamAlexandre César Léopold Bizet
Gebore25 Oktober 1838
Parys (Frankryk)
Sterf3 Junie 1875
Bougival (Frankryk)
InstrumenteOrrel, klavier

Georges Bizet (Frans: [ʒɔʁʒ bizɛ]; 25 Oktober 18383 Junie 1875) was ’n Franse komponis van die Romantiese tydperk. Hy is veral bekend vir operas soos Carmen en Die Pêrelvissers.[1]

Biografie[wysig | wysig bron]

Bizet is op 25 Oktober 1838 in Parys gebore as Alexandre-César-Léopold Bizet, maar hy is in die kerk Notre-Dame-de-Lorette as Georges gedoop, en het so bekend geword. Hy was 'n musikale wonderkind, wat vanaf nege aan die Conservatoire national supérieur de musique gestudeer en talle kompetisies gewen het. In 1857, toe hy negentien was, wen hy die prestigeryke Prix de Rome vir die eenbedryf Le Docteur Miracle.

Bizet is veral bekend vir sy operas, maar het ook simfonieë en liedere geskryf. Sy bekendste simfonie is sy eerste, die Simfonie in C uit 1855. Die stuk is die eerste keer in 1935 opgevoer nadat die manuskrip deur dirigent Felix Weingartner (1863–1942) ontdek is. Bizets se jeugdige talent kan in die simfonie opmerk word. Hy was maar sewentien toe hy dit geskryf het.

Een van sy weinige direkte suksesse was die opera Les pêcheurs de perles (Die Pêrelvissers). Hy skryf die stuk in 1863 vir die Opéra-comique in Parys. Die opera is veral bekend vir die duet in tenoor en bariton, Au fond du temple saint.

Karikatuur van Bizet, 1863, van die Franse tydskrif Diogène

Sy bekendste werk is die opera Carmen (1875). Die stuk is 'n verwerking van 'n roman met dieselfde titel van Prosper Merimee (1803–1870). Dit handel oor die dramatiese liefdesgeskiedenis van 'n Spaanse sigeunerin. Carmen was nie onmiddellik suksesvol nie. Die publiek was aanvanklik geskok deur die warmbloedige hoofkarakter en die tragiese afloop van die verhaal. Tog het Carmen later tot een van die bekendste en gewildste operas ter wêreld gegroei.

Bizet sterf op 3 Junie 1875 in Bougival aan 'n hartaanval. Hy was 36 jaar oud en is in die Père-Lachaise-begraafplaas begrawe.

Verwysings[wysig | wysig bron]

  1. HAT Taal-en-feitegids, Pearson, Desember 2013, ISBN 978-1-77578-243-8