Gérard Korsten

in Wikipedia, die vrye ensiklopedie

Gérard Korsten (gebore 1960 in Pretoria, Suid-Afrika) is 'n Oostenrykse dirigent en violis. Hy is die seun van die Suid-Afrikaanse sanger Gé Korsten en sy vrou, Elna. Hy het sy musikale loopbaan as orkestrale violis begin.

Loopbaan[wysig | wysig bron]

Na sy studies by Ivan Galamian aan die Curtis-instituut in Philadelphia, VSA, is hy na Salzburg waar hy saam met Sándor Végh opleiding ontvang het. Daarna was hy eers konsertmeester en toe assistentmusiekdirekteur van Camerata Salzburg, waarvan Végh die hoofdirigent was.

In 1987 sluit Korsten by die Kamerorkes van Europa aan as konsertmeester. Hy bou gedurende die nege jare by die ensemble noue werksverhoudinge op met dirigente soos Claudio Abbado, Nikolaus Harnoncourt en Heinz Holliger. Sedert 1996 wy hy sy loopbaan aan dirigering en verskyn gereeld saam met orkeste soos die Adelaide-simfonieorkes, BBC-Skotse Simfonieorkes, Boedapest-feesorkes, Camerata Salzburg, Kamerorkes van Europa, Helsingborg-simfonieorkes, Hong Kong- Filharmoniese Orkes, Ierse Kamerorkes, Nasionale Simfonieorkes van Letland, Orchestra della Svizzera Italiana, Orchestra Padova e Veneto, die Skotse en die Sweedse Kamerorkes en die SWR Sinfonieorchester Freiburg.

Korsten is dikwels as gasdirigent in aanvraag vir optredes saam met teaters en orkeste dwarsoor Europa, Asië, Australië en Suid-Afrika. Hy het gedien as hoofdirigent van die Londense Mozart-spelers, die Suid-Afrikaanse Staatsteater in Pretoria en die Uppsala-kamerorkes in Swede. Van 1999 tot 2005 was hy musikale direkteur van die Orchestra del Teatro Lirico di Cagliari in Sardinië. Na 13 jaar as hoof-dirigent van die Symphonieorchester Vorarlberg Bregenz van Oostenryk is Korsten in die somer van 2018 bekroon as dirigent-Laureaat. Gérard Korsten se operauitvoerings het tot dusver optredes by Teatro alla Scala, Milaan (Le nozze di Figaro); Opéra National de Lyon (Ariadne auf Naxos, Idomeneo, La traviata, Siegfried, La Veuve joyeuse en Henze se L’Upupa); die Bregenz-fees (Simon Laks se 'L’Hirondelle inattendue, Die Zauberflöte, Le Rossignol, Der Schauspieldirektor); Deutsche Oper Berlyn (La Traviata); die Engelse Nasionale Opera (Aïda); die Glyndebourne-fees (Così fan tutte, Albert Herring); die Maggio Musicale Fiorentino (Così fan tutte); die Nederlandse Opera (Così fan tutte); die Nuwe Nasionale Teater, Tokio (Tosca); die Koninklike Opera Stockholm (Don Giovanni) en die Hongaarse Staatsopera (Don Pasquale) ingesluit. By die Teatro Lirico di Cagliari dirigeer hy nie slegs die Italiaanse première van Richard Strauss se Die ägyptische Helena, Weber se Euryanthe, Delius se A Village Romeo and Juliet en Schubert se Alfonso und Estrella nie, maar ook klassieke werke van die repertoire soos Don Giovanni, Die Zauberflöte , Il barbiere di Siviglia, Don Pasquale, La Traviata, Lucia di Lammermoor, Aida, Tosca, Carmen, Die Fledermaus en onlangs Un ballo in maschera van Verdi. Tydens die 2018/'19-seisoen volg heruitnodigings na die Boedapest-fees-orkes, Orquesta Filarmónica de Gran Canaria, die Sweedse Kamerorkes en Uppsala-kamerorkes.[1]

Korsten se Arthaus-DVD van Le nozze di Figaro, opgeneem by La Scala met 'n rolverdeling gelei deur Diana Damrau en Ildebrando d’Arcangelo, is bekroon met 'n Diapason D'Or in Frankryk en word deur die Amerikaanse tydskrif Opera News aangewys as die Critic's Choice. Sy ander opnames sluit in Tsjaikofski se Serenade en Souvenir de Florence met die Kamerorkes van Europa (Deutsche Grammophon), orkeswerke van Crusell, Lindblad en Eggert (Naxos), La Veuve joyeuse (DVD, Erato) en 'n aantal lewendige opnames met die Teatro Lirico di Cagliari naamlik: Die ägyptische Helena, Euryanthe en Lucia di Lammermoor op CD (Dynamic) en, op DVD, Alfonso und Estrella (Dynamic) en Don Pasquale (Arthaus).[2]

Korsten het twee dogters en woon in Zürich en Arezzo (Toskane) saam met sy vrou, die Italiaanse sopraan Eva Mei.

Verwysings[wysig | wysig bron]

  1. http://www.gerard-korsten.com/biography/. Besoek op 01/08/2019
  2. http://www.gerard-korsten.com/biography/. Opgespoor en besoek op 01/08/2019