Highgate

Highgate
Voorstad
Highgate, soos gesien vanuit Hampstead Heath
Highgate
Koördinate: 51°34′00″N 0°09′00″W
Land	Verenigde Koninkryk
Land	Engeland
Graafskap	Groter Londen
Boroughs	Camden Haringey Islington
Tydsone	UTC±00:00 (MGT)
• Somertyd	UTC+01:00 (BST)
Poskode	N6
Skakelkodes	020

Highgate [ˈhaɪɡeɪt] of [ˈhaɪɡɨt] is 'n voorstad in Noord-Londen wat by die noordwestelike hoek van Hampstead Heath geleë is, 7,2 km noord-noordwes van Charing Cross.

Nog tot in die laat Victoriaanse tydperk was Highgate 'n dorp wat buite Londen langs die hoofpad na die noorde geleë was. Die nedersetting het steeds 'n sterk landelike karakter en is temidde van uitgestrekte groen ruimtes geleë, waaronder die oostelike deel van Hampstead Heath, drie ou bosgebiede, Waterlow Park en die hellings wat as die Highgate bowl bekendstaan. 'n Sterk plaaslike omgewingsliggaam, die Highgate Society, beywer hom vir die bewaring van Highgate se karakter.

Dit is juis sy aantreklike ligging en rustige dorpskarakter wat van Highgate een van die duurste voorstede in die Britse hoofstad gemaak het. Die dorpsgebied in sy sentrum word deur geboue in die Georgiaanse styl oorheers, waaronder winkels, kroeë, restourante en woonstrate, met 'n verskeidenheid bekende bakens en historiese monumente soos St Michael's-kerk met sy kenmerkende toring, St. Joseph's-kerk met sy groen koperkoepel, Highgate School wat van 1565 dateer, die Jacksons Lane-kunssentrum wat in 'n vroeëre kerkgebou gehuisves word, die kroeg Gatehouse Inn van 1670 en Berthold Lubetkin se baanbrekende moderne Highpoint-woonstelblokke, 'n uitstekende voorbeeld van Internasionale Styl-boukuns. Die Highgate-begraafplaas is een van die Britse hoofstad se bekendste vredehowe.