Homo rudolfensis

in Wikipedia, die vrye ensiklopedie

Homo rudolfensis
Tydperk: Pleistoseen, 1.9 m. jaar gelede
’n Rekonstruksie van skedel KNM ER 1470
Wetenskaplike klassifikasie
Koninkryk:
Filum:
Klas:
Orde:
Familie:
Genus:
Homo (?)
Spesie:
H. rudolfensis
Binomiale naam
Pithecanthropus rudolfensis
(Valeri Pavlovich Alekseyev, 1978)[1]

Homo rudolfensis (ook Australopithecus rudolfensis) is ’n uitgestorwe spesie van die Hominini-tribus waarvan net ’n paar fossiele bestaan. Die eerste hiervan is in 1972 deur Bernard Ngeneo, ’n lid van die span onder die antropoloog Richard Leakey en die zoöloog Meave Leakey, ontdek by Koobi Fora, aan die oostekant van die Rudolfmeer (nou die Turkanameer) in Kenia.

Die naam Pithecanthropus rudolfensis is in 1978 voorgestel deur Valeri Pavlovich Alekseyev,[1] wat dit later (in 1986) verander het na Homo rudolfensis[2] vir die skedel KNM ER 1470. Daar word steeds gedebatteer oor of die fossiel genoeg verskille verteenwoordig om ’n aparte spesie te regverdig, en indien wel, of dit geklassifiseer moet word onder die genus Homo of Australopithecus.

Op 8 Augustus 2012 het ’n span onder leiding van Leakey die ontdekking aangekondig van ’n gesig en twee kakebene wat tot H. rudolfensis behoort.

KNM-ER 1470[wysig | wysig bron]

UR 501 (oorspronklike fossiel), die oudste fossiel van die genus Homo.

Die fossiel KNM-ER 1470 was die middelpunt van ’n groot debat oor dié spesie. Die skedel is eerstens verkeerdelik gedateer op byna 3 miljoen jaar, voor die tyd van die spesie Homo habilis.

Sedertdien is die raming verander na 1,9 miljoen jaar, maar die verskille tussen dié skedel en skedels van Homo habilis is blykbaar te groot en daarom word veronderstel dit behoort tot die nuwe spesie Homo rudolfensis, wat saam met Homo habilis gelewe het. Dit is onseker of H. rudolfensis of H. habilis ’n voorouer van die latere spesies van Homo was en of ’n derde spesie, wat nog nie ontdek is nie, die voorouer was.

In Maart 2007 het ’n span onder Timothy Bromage, ’n antropoloog aan die Universiteit van New York, die skedel van KNM-ER 1470 gerekonstrueer. Dié nuwe konstruksie het baie aapagtig gelyk, moontlik vanweë ’n te groot rotasie van die skedel,[3] en die grootte van die harsingkas is verklein van 752 cm3 tot sowat 526 cm3, hoewel dit betwis word.[4] Volgens Bromage het sy span se rekonstruksie biologiese kennis gebruik oor die presiese verhouding tussen die grootte van die oë, ore en mond in soogdiere wat nie met die skedel se ontdekking bekend was nie.[4]

Fossielvonds in 2012[wysig | wysig bron]

In Augustus 2012 het ’n span onder Leakey ’n verslag in die tydskrif Nature gepubliseer waarin hulle nog drie fossiele van H. rudolfensis aankondig wat in Noord-Kenia gevind is: twee kakebene met tande en ’n gesig.[5][6] Die gesig (fossiel KNM-ER 62000) was van ’n jong dier, maar het eienskappe soortgelyk aan KNM-ER 1470 gehad – dit het tot die veronderstelling gelei dat die skedel van ’n nuwe spesie is, eerder as van ’n groot manlike H. habilis.[7] Die gesig is beskryf is baie plat, en korter en vierkantiger as bekende H. habilis-fossiele.[7]

Die fossiele is dateer op sowat 2 miljoen jaar, wat ooreenstem met die tyd van H. habilis.[8] Volgens Leakey et al. bevestig die nuwe fossiele die bestaan van twee spesies van die vroeë Homo wat tydgenote was (habilis en rudolfensis), bykomend tot Homo erectus in die vroeë Pleistoseen van Oos-Afrika".[6] Sommige ander wetenskaplikes stem egter nie saam nie en het onder meer voorgestel die fossiele word met ander moontlikhede soos Australopithecus africanus en Australopithecus sediba vergelyk.[8] Daar word ook bevraagteken dat ’n fossiel se spesie bepaal kan word op grond van ’n paar tande, kakebene en onderste dele van ’n gesig as in ag geneem word hoe groot verskille tussen individue in ’n enekele spesie kan wees.[9]

Verwysings[wysig | wysig bron]

  1. 1,0 1,1 В.П. Алексеев. Палеоантропология земного шара и формирование человеческих рас. М., Наука, 1978г.
  2. Wood, B. (1999). "'Homo rudolfensis' Alexeev, 1986: Fact or phantom?". Journal of Human Evolution. 36 (1): 115–118. doi:10.1006/jhev.1998.0246. PMID 9924136.
  3. John Hawks (31 Maart 2007). "KNM-ER 1470 is not a microcephalic" (in Engels). Geargiveer vanaf die oorspronklike op 27 April 2019.
  4. 4,0 4,1 Than, Ker (29 Maart 2007). "Controversial Human Ancestor Gets Major Facelift". LiveScience (in Engels). Geargiveer vanaf die oorspronklike op 27 April 2019. Besoek op 8 Augustus 2012.
  5. Ghosh, Pallab (9 Augustus 2012). "Many human 'prototypes' coexisted in Africa" (in Engels). BBC News. Geargiveer vanaf die oorspronklike op 2 Februarie 2020. Besoek op 8 Augustus 2012.
  6. 6,0 6,1 Leakey, Meave; Spoor, Fred; Dean, M. Christopher; Feibel, Craig S.; Antón, Susan C.; Kiarie, Christopher; Leakey, Louise N. (8 Augustus 2012). "New fossils from Koobi Fora in northern Kenya confirm taxonomic diversity in early Homo". Nature. 488 (7410): 201–4. Bibcode:2012Natur.488..201L. doi:10.1038/nature11322. PMID 22874966. Besoek op 9 Augustus 2012.
  7. 7,0 7,1 Wayman, Erin (8 Augustus 2012). "Multiple Species of Early Homo Lived in Africa". Smithsonian Magazine (in Engels). Geargiveer vanaf die oorspronklike op 12 Desember 2013. Besoek op 9 Augustus 2012.
  8. 8,0 8,1 Landau, Elizabeth (8 Augustus 2012). "Fossils complicate human ancestor search" (in Engels). CNN. Geargiveer vanaf die oorspronklike op 2 Augustus 2019. Besoek op 9 Augustus 2012.
  9. Kaplan, Matt (8 Augustus 2012). "Fossils point to a big family for human ancestors". Nature (in Engels). Geargiveer vanaf die oorspronklike op 27 April 2019. Besoek op 8 Augustus 2012.

Eksterne skakels[wysig | wysig bron]