Luciano Leggio

in Wikipedia, die vrye ensiklopedie
Luciano Leggio
Leggio in 1974.
Leggio in 1974.
Gebore  (1925-01-06)6 Januarie 1925
Corleone, Sisilië
Oorlede  15 November 1993 (op 68)
Nuoro, Sardinië
Rede vir dood  Hartaanval
Land  Vlag van Italië Italië
Beroep  Mafioso
Ander name  Luciano Liggio
Misdaadbesonderhede
Misdaad  Moord
Slagoffers  Michele Navarra
Beweging  Sisiliaanse Mafia
Vonnisbesonderhede
Aangekeer  16 Mei 1974
Vonnis  Lewenslange tronkstraf
Status  Oorlede

Luciano Leggio (6 Januarie 1925 – 16 November 1993) was ’n Italiaanse misdadiger en ’n leiersfiguur in die Sisiliaanse Mafia. Hy was hoof van die Corleonesi, die Mafiafaksie wat op die dorp Corleone ontstaan het. Hy is ook bekend onder die van Liggio weens ’n spelfout in hofdokumente van die 1960's.[1]

Hy was die man wat die Corleonesi die oorheersende familie van die Mafia in Sisilië gemaak het en was bekend daarvoor dat hy vonnisoplegging vir verskeie misdade vrygespring het, onder meer manslag, voordat hy eindelik in 1974 lewenslange tronkstraf opgelê is.

Loopbaan[wysig | wysig bron]

Leggio was een van 10 kinders wat in ’n uiters arm familie op ’n plaas grootgeword het. Hy het hom in sy tienerjare tot misdaad gewend. Ná tronkstraf van ses maande vir die steel van mielies het hy die man vermoor wat hom by die polisie gaan verkla het.

In 1945 het die Mafiabaas Michele Navarra hom gewerf vir die Corleone-familie. Nadat hy nog ’n man vermoor het, het hy Salvatore Riina (toe 19) in die tronk ontmoet en die twee het bondgenote geword, ook van Calogero Bagarella en Bernardo Provenzano.

Leggio het gou sy eie faksie van mafiosi opgebou wat net aan hom lojaal was, insluitende Riina en Provenzano, en in 1956 het die Leggio-faksie oorlog verklaar teen Navarra en sy volgelinge. Op 2 Augustus 1958 het Leggio, Riina, Provenzano en nog ander Navarra in ’n lokval gelei en doodgeskiet. Leggio het homself tot baas van Corleone verklaar en oor die volgende vyf jaar het hy en sy manne tientalle van Navarra se ondersteuners vermoor. In die 1960's en vroeë 1970's het Leggio die mag van die Corleonesi vergroot en almal vermoor wat in sy pad gestaan het. Hy wou veral die heroïenhandel beheer wat gou ’n groot bron van inkomste vir die Mafia was.

Hy is in Mei 1964 in hegtenis geneem en van die moord op Navarra aangekla. Hy is vrygespreek weens ’n gebrek aan getuienis. In 1968 het hy saam met 113 ander verdagtes tereggestaan op aanklag van die Ciaculli-slagting, maar hy en die meeste ander is vrygespreek. Hy is egter nie vrygelaat nie, want hy moes nog in 1969 verhoor word vir die moord op nege van Navarra se manne. Dié keer is hy saam met meer as 60 van die lede van die Corleonesi aangekla, onder andere Riina.

Daar was berigte oor die blatante intimidasie van getuies en ’n gepeuter met die getuienis.[2] Die regters en aanklaers het ook naamlose briewe gekry waarin hulle met die dood gedreig is. Eindelik is al die verdagtes vrygespreek.

Voortvlugtige[wysig | wysig bron]

Onmiddellik ná die einde van die verhoor in Julie 1969 het ’n vasberade Italiaanse magistraat, Cesare Terranova, beswaar gemaak teen Leggio se vryspreking op aanklag van die Navarra-moord. In Desember 1970 is Leggio eindelik skuldig bevind en tot lewenslange tronkstraf gevonnis, maar dit was in absentia, want hy was op die vlug.

Hy is eindelik op 16 Mei 1974 in Milaan gevang en moes sy vonnis uitdien vir die moord op Navarra. Hy het aanvanklik nog beheer vanuit die tronk uitgeoefen, maar teen die einde van die 1970's was sy tweede in bevel, Salvatore Riina, in beheer van die Corleonesi.

Leggio is op 16 November 1993 op 68-jarige ouderdom in die tronk dood aan ’n hartaanval.[3]

Verwysings[wysig | wysig bron]

  1. Obituary: Luciano Liggio, The Independent, 17 November 1993
  2. Dickie, John (Oktober 2005). Cosa Nostra: A History of the Sicilian Mafia (Slapband uitg.). Palgrave Macmillian. pp. 263–264. ISBN 978-1403970428.
  3. Luciano Leggio; Mafia Boss, 68, The New York Times, 16 November 1993

Bronne[wysig | wysig bron]

  • Dickie, John (2004). Cosa Nostra. A history of the Sicilian Mafia, Londen: Coronet, ISBN 0-340-82435-2 (Resensie in die Observer, 15 Februarie 2004)
  • Sterling, Claire (1990). Octopus. How the long reach of the Sicilian Mafia controls the global narcotics trade, New York: Simon & Schuster, ISBN 0-671-73402-4
  • Stille, Alexander (1995). Excellent Cadavers. The Mafia and the Death of the First Italian Republic, New York: Vintage ISBN 0-09-959491-9

Eksterne skakels[wysig | wysig bron]