Paul Desmond (gebore as Paul Emil Breitenfeld, 25 November1924 – 30 Mei1977) was 'n Amerikaanse jazz musikant wat die alt-saxofoon bespeel het. Hy was ook 'n komponis, en is bekend vir sy werk saam met die Dave Brubeck Kwartet. Hy het die kwartet se grootste treffer, "Take Five", gekomponeer. Hy was een van die mees populêre musikante van die cool jazz genre.
Bykomend tot sy werk saam met Brubeck het hy ook verskeie groepe gelei en saamgewerk met Gerry Mulligan, Chet Baker, Jim Hall en Ed Bickert. Desmond sterf in 1977 aan longkanker na 'n toer saam met Brubeck.
Desmond is in 1924 as Paul Emil Breitenfeld in San Francisco, Kalifornië gebore as die seun van Emil Aron en Shirley (gebore King) Breitenfeld. [1] Sy oupa Sigmund Breitenfeld is volgens 'n doodsberig in 1857 in Oostenryk gebore. Sigmund Breitenfeld, 'n geneesheer, het saam met sy vrou Hermine (gebore Hermine Lewy) aan die einde van die 19de eeu na New York geëmigreer. Die Breitenfelds het hul vier kinders (waaronder Desmond se vader Emil) sonder godsdiens grootgemaak. Volgens Desmond se biograaf Doug Ramsey het Desmond se neef, Rick Breitenfeld gesê dat "niemand in die Breitenfeld-familie bewyse van Joodse voorouers kon vind nie, maar dat Paul Desmond en lede van sy vader se familie gereeld bespiegel het of Sigmund en Hermine Breitenfeld 'n Joodse agtergrond gehad het."[2] Sy biograaf merk op dat "die naam Breitenfeld Joods of nie-Joods kan wees. Daar is baie Breitenfelds in Duitsland en Oostenryk wat beide kante van die argument kan ondersteun. Lewy, die nooiensvan van Paul se ouma aan vaderskant, is waarskynlik van Joodse oorsprong, maar geen bewyse van haar geslagsregister kon opgespoor word nie."[2][3][4] Die komponis en liedjieskrywer Fred Barton (Desmond se neef) het egter uitgebreide genealogiese bewyse gevind dat beide die Breitenfeld en Löwy-families Jode uit Boheme was. Desmond se moeder, gebore as Shirley King, was van Iers-Katolieke afkoms.
Desmond se vader, Emil Breitenfeld, was 'n pianis, orrelis en komponis. Breitenfeld het klanklose rolprente in rolprentteaters begelei en musiekverwerkings gemaak vir gedrukte publikasies en teaterproduksies.
Desmond se moeder Shirley was emosioneel onstabiel. Dit wil voorkom asof sy aan obsessiewe – kompulsiewe versteuring en ander geestesongesteldhede gely het. [2] Vanaf 1933 het Desmond vir byna vyf jaar saam met familielede in New Rochelle, New York gewoon weens sy ma se geestesongesteldheid. Desmond het op twaalfjarige ouderdom die klarinet begin aanleer en daarmee voortgegaan aan die San Francisco Polytechnic High School. Tydens hoërskool wou hy die viool aanleer, maar sy pa het hom daarvan laat afsien en gesê dat "hy honger sal ly aangesien daar baie violiste is". Desmond het tydens sy hoërskooljare ook 'n talent vir skryf ontwikkel en mede-redakteur van sy hoërskoolkoerant geword. Hy het in die hoedanigheid 'n onderhoud met die komediant Bob Hope gevoer tydens een van Hope se besoeke aan San Francisco. As eerstejaarstudent aan San Francisco State College het Desmond die alt-saxofoon begin bespeel. Gedurende sy eerste studiejaar is Desmond opgeroep vir diensplig in die Amerikaanse Leër. Hy het by die weermagorkes aangesluit terwyl hy in San Francisco gestasioneer was. Hy het drie jaar in die weermag gedien. [5]
