Saguenayrivier

in Wikipedia, die vrye ensiklopedie
Saguenayrivier
Die Saguenayrivier in die Saguenay Fjord National Park.
Die Saguenayrivier in die Saguenay Fjord National Park.
Die Saguenayrivier in die Saguenay Fjord National Park.

Die stroomgebied van die Saguenayrivier.

Oorsprong Saint-Jeanmeer naby Alma, Quebec
Monding naby Tadoussac in die Sint-Laurensrivier
Stroomgebied Quebec, Kanada
Lengte 160 km (100 myl)
Mondinghoogte 0 m
Gemiddelde afloop 1 750 m/s³ (61 800 ft³/s)
Stroomgebiedopp. 88 000 km² (34 000 myl²)
Kaart van die Outaouaisrivier-bekken in Noord-Amerika.
Kaart van die Outaouaisrivier-bekken in Noord-Amerika.

Saguenayrivier (Frans: rivière Saguenay, Engels: Saguenay River) in die suide van Quebec (Kanada) vloei in twee kanale, die Grande Décharge en die Petite Décharge, wat deur die Alma-eiland van mekaar geskei word, uit die Saint-Jeanmeer (Frans: Lac Saint-Jean) in die Laurentiese Hoogland. Dit is 'n takrivier van die Sint-Laurensrivier met 'n lengte van sowat 176 km. Die Saguenay is 'n belangrike bron van hidroëlektriese krag en 'n gewilde toeristebestemming. Sy uitmonding in die Sint-Laurensrivier naby Tadoussac vorm die Saguenayfjord. Die Saguenay se belangrikste takrivier is die Peribonca.

Die rivier vloei baie sterk en word deur steil rotswande begrens, wat hoogtes van meer as 450 meter bereik. Getywater vloei sowat eenhonderd kilometer stroomop tot by Chicoutimi, sodat die rivier se benedeloop bevaarbaar is. Die Saguenay is 'n gewilde broeiplek vir talle beloegawalvisse. Ook Greenland-haaie kom in die rivierwater voor. Kanada se nasionale Parc marin du Saguenay–Saint-Laurent dek die samevloeiing van Saguenay- en Sint-Laurensrivier.

Geskiedenis[wysig | wysig bron]

Monding van die Saguenayrivier

Die Saguenayrivier, wat na die legendariese Indiaanse Koninkryk Saguenay vernoem is, was reeds 'n beduidende handelsroete vir die Eerste Nasies in die gebied, toe dit in 1535 deur die Franse seevaarder Jacques Cartier ontdek is, terwyl Samuel de Champlain sy benedeloop in 1603 verken het. Tadoussac, wat in 1600 gestig is, was Frankryk se eerste handelspos in Kanada.

Die rivier het sowat drie eeue lank as 'n belangrike waterweg vir verkenners, sendelinge en pelshandelaars gedien en is later vir die vervoer van boomstamme en as toegang tot jag- en visserygebiede gebruik.

Papiermeule en hidroëelektriese kragsentrales is in die 20ste eeu langs die oewers van die Saguenay en sy takriviere opgerig. Die aluminiumaanleg in Jonquière is die grootste van sy soort wêreldwyd. Die rivier het 'n belangrike toeristebestemming geword, en stoomboottoere vanuit Quebecstad lok talle besoekers.

Die groot oorstromings by die Saguenay se takriviere het in Julie 1996 groot skade in die gebied berokken en tien lewens geëis. Naas die regering het ook mense dwarsoor Kanada finansiële steun aan die slagoffers verleen en sodoende ná die naelskraap neerlaag van die Quebecse onafhanklikheidsbeweging in die 1995-referendum ook 'n boodskap van politieke eenheid na die Franstalige Kanada gestuur.

Franse kultuur[wysig | wysig bron]

Die bewoners van die Saguenaygebied het 'n groot rol in die geskiedenis van Quebec se onafhanklikheidsbeweging gespeel, en die Parti Québécois het hier sy eerste sukses in verkiesings behaal. Die ekonomiese ontwikkeling van die Saguenaygebied en sy feitlik eentalige Franse kultuur het vir die res van Quebec bewys dat 'n gunstige ekonomiese klimaat die steun vir die onafhanklikheidsbeweging sal verhoog.

Eksterne skakels[wysig | wysig bron]

Verwysings[wysig | wysig bron]

  • Saguenay River. (2008). Encyclopædia Britannica. Deluxe Edition. Chicago: Encyclopædia Britannica.