Siegfried Mynhardt
| Siegfried Mynhardt | |
| |
Siegfried Mynhardt as jongeling – toe hy by Anna Wensma-Klaasen aangesluit het om in Napoleon se Wasvrou op te tree in 1930.
| |
| Geboortenaam | Siegfried Charles Ferdinand Mynhardt |
|---|---|
| Alias | Siegie |
| Geboorte | 5 Maart 1909 Johannesburg |
| Sterfte | 29 Maart 1996 Johannesburg |
| Nasionaliteit | Suid-Afrika |
| Beroep(e) | Akteur |
| Aktiewe jare | 1956–1990 |
| Toekennings | Verskeie, sien teks. |
| Internet-rolprentdatabasis-profiel | |
Siegfried Mynhardt, alombekend as Siegie (5 Maart 1909 – 29 Maart 1996), was ’n bekende Afrikaanse toneelspeler. Hy het sy loopbaan in 1929 onder Hendrik en Mathilda Hanekom in die toneelstuk Onskuldig Veroordeel begin en daarna lid geword van die geselskappe van Paul de Groot en André Huguenet.
Mynhardt het in meer as 500 toneelstukke opgetree, asook in talle rolprente en TV-flieks. Hy het tot voor sy dood op 87 nog toneelgespeel.[1] Een van sy laaste groot rolle was op 79 in Die Houtbord, waarvoor hy met ’n Artes bekroon is as beste akteur.
Loopbaan[wysig | wysig bron]
Mynhardt het hom in die dertigerjare by die Old Vic-teatergeselskap in Londen aangesluit, maar hy het na Suid-Afrika teruggekeer toe die Tweede Wêreldoorlog uitbreek. Tydens die oorlog het hy, Lydia Lindeque en ’n klompie ander akteurs in Noord-Afrika opvoerings vir Suid-Afrikaanse soldate gehou.
In 1947 was hy een van die stigterslede van die Nasionale Toneelorganisasie. Hy het daarna vir die Engelse geselskap van Truk in toneelstukke soos Heartbreak House, The Affair, Child's Play, The Miser en Hadrian VII gespeel, en daarna vir Kruik. In 1972 het hy en die akteur Michael Mayer vir ’n opskudding gesorg met waarskynlik die eerste gay soen op die Suid-Afrikaanse verhoog in die dramaturg Robert Kirby se Gentlemen.[2]
Van Mynhardt se silwerdoek- en TV-prente sluit in: Oom Willem en die Lord (die eerste Afrikaanse TV-prent), Dingaka, Debbie, Moeder Hanna, Die Klimop en die Kersietuin, Troudag van Tant Ralie, Rienie, Kootjie Emmer, Daar Kom Tant Alie, Majuba, Dr. Kalie, Danie Bosman, Tekwan, Die Houtbord, Ingqumbo Yeminyanya (Wrath of the Ancestors), Dans van die Flamink, asook die internasionale rolprent The Emissary.
Sedert sy vrou se dood in 1981 het hy alleen in Johannesburg gewoon. Hy is op 29 Maart 1996 op 87 dood nadat hy in ’n koma gegaan het.
Pryse[wysig | wysig bron]
Mynhardt het in sy lewe verskeie pryse ontvang, onder andere die koningin se kroningsmedalje vir sy diens aan die Suid-Afrikaanse teater in die jare vyftig, die Erepenning vir Toneelkuns van die Suid-Afrikaanse Akademie vir Wetenskap en Kuns in 1957, die Stewart Leith-trofee minstens twee keer as beste akteur in ’n besondere jaar (in die jare sestig en sewentig),[1] die Orde van Voortreflike Diens in die goud-klas (1989)[3] en in dieselfde jaar die Artes vir beste akteur.[4]
Filmografie[wysig | wysig bron]
As akteur:
- Blind Justice, 1990
- Auf Achse (TV-reeks), 1983
- Rienie, 1980as Gysbert (Oom Gytjie)
- Kootjie Emmer, 1977
- Die Vlindervanger, 1976
- Daar Kom Tant Alie, 1976 as kol. Brown
- Die Troudag van Tant Ralie, 1975
- Funeral for an Assassin, 1974 as regter William Whitfield
- Tant Ralie se Losies Huis, 1974
- Dans van die Flamink, 1974 as Oom Jurie
- Die Bankrower, 1973
- Stop Exchange, 1970
- Lied in My Hart, 1970
- Danie Bosman, 1969
- Majuba: Heuwel van Duiwe, 1968 as Philippus Du Toit
- Dr Kalie, 1968 as Kalie Muller
- Jy is My Liefling, 1968 as Du Toit
- The Cape Town Affair, 1967 as Fenton
- The Second Sin, 1966 as regter
- Debbie, 1965 as mnr. Malan
- Tokoloshe, 1965
- Dingaka, 1964 as regter
- Rip van Wyk, 1959 as repeterende akteur
- Paul Krüger, 1956 as President Burgers
- Die Skerpioen, 1946
Verwysings[wysig | wysig bron]
- ↑ 1,0 1,1 Veteraan Siegfried Mynhardt op 80 Die teater bly Siegie se eerste en laaste liefde Geargiveer 28 November 2015 op Wayback Machine, Die Burger, 4 Maart 1989
- ↑ Doktorale proefskrif wys rol van gay teater uit, Die Burger, 19 Oktober 1999
- ↑ SP vereer Siegfried Mynhardt vir diens Geargiveer 28 November 2015 op Wayback Machine, Die Burger, 26 April 1989
- ↑ Dieselle anderste storie van die Artes Geargiveer 28 November 2015 op Wayback Machine, Die Burger, 29 April 1989