Vervoerband
Vervoerbande is installasies waarmee goedere en materiale oor kort afstande vervoer word. Die arbeidsbesparing wat dit meebring, vergoed binne 'n kort tyd vir die oprigtingskoste van die band. Moderne vervoerbande (roltrappe) word ook vir die vervoer van mense in gebouekomplekse gebruik.
Vervoerbande word vir die deurlopende vervoer van goedere gebruik sander om van byvoorbeeld trollies, waens of ander voertuie gebruik te maak. Dit word veral vir massavervoer (graan, steenkool, sement, ensovoorts) en by verpakkingsaanlêe gebruik. In spesiale gevalle word dit ook vir die vervoer van onderdele in monteringsaanlêe en vir die vervoer van mense gebruik. Die vervoerband bestaan gewoonlik uit 'n aaneenlopende band of 'n band met segmente (rusperband) wat oor rollers beweeg. Die band word aan die kante deur skuinsstaande rollers ondersteun ten einde te voorkom dat iets daaruit val.
Bekende vervoerbande is die volgende:
- Die hyserband, met bakkies daarop, vir vertikale vervoer.
- Die houerband, wat horisontaal loop maar houers dra wat vertikaal hang.
- Die aaneenlopende band, wat teen 'n helling van tot 35° loop.
- Die rollerbaan, waarby geen band gebruik word nie, maar die goedere op rollers aangeskuif word.
- Die glybaan, wat in werklikheid ʼn geut is waarin materiaal kan afgly.
Bronnelys[wysig | wysig bron]
- Wêreldspektrum, 1982, ISBN 0908409699, volume 28, bl. 136, 137
Eksterne skakels[wysig | wysig bron]
Wikimedia Commons het meer media in die kategorie Vervoerband.- Wiki oor alle soorte Vervoerbande
- Webwerf met inligting oor swaardiens-vervoerbande vir die steenkool- en mynbedryf
- Beste vervoerband vervaardigers Geargiveer 17 September 2019 op Wayback Machine
