Walt Whitman

in Wikipedia, die vrye ensiklopedie
Walt Whitman
Walt Whitman in 1887
Gebore31 Mei 1819
West Hills, New York
Sterf26 Maart 1892 (op 72)
Camden, New Jersey
NasionaliteitVlag van Verenigde State van Amerika Verenigde State
Beroepdigter, essayis, joernalis
Bekend virLeaves of Grass
Ouer(s)Walter en Louisa Van Velsor Whitman
Handtekening

Walter "Walt" Whitman (* 31 Mei 1819 in West Hills, New York; † 26 Maart 1892 in Camden, New Jersey) was 'n Amerikaanse digter, essayis en joernalis. As humanis het hy deel uitgemaak van die oorgang tussen transendentalisme en literêre realisme sodat sy werke albei genres weerspieël. Whitman word beskou as een van die mees invloedryke digters in die Amerikaanse literêre geskiedenis, en na hom word dikwels verwys as die "vader van vrye vers".

Hy is veral bekend vir sy digbundel, Leaves of Grass, wat hy in 1855 gepubliseer het om die gemiddelde persoon bekend te stel aan digkuns. Hy het verskeie ander digters ná hom beïnvloed om nuut te kyk na digkuns styl en onderwerp. Sy literêre werk was in sy leeftyd nogtans omstrede - so ook sy Leaves of Grass wat vanweë sy onbeskaamde seksualiteit as aanstootlik beskryf is. Whitman het dié digbundel tot met sy afsterwe in 1892 uitgebrei en hersien.

Walt Whitman het as joernalis gevorder tot redakteur van die nuusblad Daily Eagle, maar het die werk verloor as gevolg van sy politieke uitgesprokenheid. Whitman is geken as 'n komplekse mens wat 'n letterkundige persoonlikheid gebou het gedurende sy lewensloop deur veral gebruik te maak van fotografie, wat 'n relatiewe nuwe medium in sy leeftyd was.

Teen die einde van sy lewe het Whitman 'n beroerte gehad, en hy het vervolgens na Camden in New Jersey verhuis. Hier het sy gesondheidstoestand versleg. Hy is op die ouderdom van 72 oorlede, en 'n groot aantal mense het sy begrafnis bygewoon.

Naas sy digkuns wek ook Whitman se seksualiteit steeds belangstelling. Alhoewel die debat daaroor voortgaan, word die digter se gevoelens en attraksies gewoonlik as homo- of biseksueel beskryf. Sy biograwe huldig nietemin nog uiteenlopende menings oor Whitman se seksuele verhoudings en die rol wat mans in sy lewe gespeel het.

Whitman het hom sy lewe lank met politiek besig gehou. Hy het die Wilmot Proviso ondersteun en was gekant teen die uitbreiding van slawerny. Sy digkuns impliseer die gelykheid van rasse, en Whitman het een keer vir die afskaffing van slawerny gepleit. Later het hy die anti-slawernybeweging egter as 'n bedreiging vir die demokratiese stelsel beskou.[1]

Sy lewe het Jan Christian Smuts beïnvloed om die gedagte van holisme te ontwikkel wat bygedra het tot die ontwikkeling van stelselteorie.

Verwysings[wysig | wysig bron]

Eksterne skakels[wysig | wysig bron]