Spier-wynlandgoed

Spier is 'n historiese wynlandgoed wat 'n beduidende rol speel in die toerismebedryf van Stellenbosch, Suid-Afrika.

Ligging

Die plaas lê op die vrugbare vloedvlakte van die Eersterivier en die laer hellings van die Helderbergreeks. Dit is by 38° 58′ 24.63″ suid, 18° 47′ 2.23″ oos, naby Lynedoch en langs die Baden Powell-pad (die R310) en die spoorlyn tussen Stellenbosch en Faure, Somerset-Wes en die Strand. Meerlust is 'n bekende buurplaas.

Toerisme

Die opstal huisves tans 'n hotel, restaurante en winkels. Geriewe is ingerig vir perdry, tennis en gholf en die besigtiging van wilde diere (o.a. arende en jagluiperds).

Geboue

Die plaashuis en die buitegeboue het verskeie besondere gewels. Op Spier staan die oudste gedateerde wynkelder in die land. Dit het 'n eenvoudige holbolgewel met die jaartal 1767. Al die geboue, die slaweklok en baie akkerbome is om 'n groot werf gegroepeer, behalwe die wynkelder. Dit staan agter die plaashuis, weg van die ander geboue.

Eienaars

W.A. van der Stel het die plaas in 1692 aan Arnoud Jansz, 'n Duitse soldaat in diens van die V.O.C., toegeken en hy plant die eerste wingerd aan, maar verkoop die plaas in 1712 aan Hans Hendrik Hattingh wat die eerste druiwe daar pars. Na verskeie eienaars was die plaas vir 'n eeu in besit van die Van der Byl-familie. Latere eienaars is bekendes soos die Kaapstadse sakeman John Dean Cartwright (* 9 April 1845, Engeland - † 16 Oktober 1930 Nuweland), C.J. Rhodes, Niel Joubert en vanaf 1993 die sakeman, politikus en kunsversamelaar Dick Enthoven (* 1937 - † 2 Desember 2022).

Sien ook

Lys van wynkelders in Suid-Afrika

Bibliografie

Fourie, Hérine: Stellenbosch Winelands. Stellenbosch: Maxprod CC, 2003. ISBN 0-9584687-1-0
Knox. Graham: Estate Wines of South Africa. Kaapstad: David Philip, 1976. ISBN 0-949968-63-3
Opperman, Dirk (red.): Gees van die wingerd. Kaapstad: Human & Rousseau, 1968

Eksterne skakels

Amptelike webwerf