Stem oor IP

in Wikipedia, die vrye ensiklopedie
Spring na: navigasie, soek
'n Skematiese voorstelling van "Stem oor IP"-kommunikasie.
'n VoIP-telefoon

Stem oor IP of VoIP (Engels vir Voice Over IP) is die oordrag van spraak (stemdata) tussen gebruikers oor die Internet of 'n ander IP-netwerk. Hierdeur word telefonie oor datanetwerke moontlik en kan die voorheen afsonderlike wêrelde van spraak- en datakommunikasie saamgevoeg word. Kostes word sodoende bespaar omdat dieselfde infrastruktuur vir beide doele gebruik word. Stem oor IP maak ook die ontwikkeling van nuwe innoverende produkte en dienste moontlik.

VoIP is nie dieselfde as VoDSL nie. By VoDSL word 'n telefoonlyn oor 'n ADSL-lyn geïmplementeer sonder om van die Internet gebruik te maak.

Geskiedenis[wysig]

Daar was al sprake van VoIP sedert die ontstaan van die rekenaarnetwerk. Teen 1973 word die eerste stempakkette versend. Die tegnologie om dit te doen was vanaf 1980 ook vir normale rekenaargebruikers beskikbaar. In 1996 kom 'n program Vocaltec Internet Phone Release 4 op die mark, met opsies soos stempos (voicemail) en oproeper-ID (caller-id). Die program kon nie oproepe na ouer telefoonlyne maak nie, maar slegs na ander Vocaltec-gebruikers. In 1998 word die tegnologie verder verbeter en kon oproepe na enige telefoon gemaak word.