Stormberg-groep

in Wikipedia, die vrye ensiklopedie
Jump to navigation Jump to search
Stormberg-groep in groen

Die Stormberg-groep bestaan uit geologiese formasies wat in die Karoo-kom van Suid-Afrika gevind word. Dit bestaan hoofsaaklik uit sandsteen, moddersteen en kalksteen, en word direk bo-op die Beaufort-groep aangetref. Die groep vertoon 'n reeks formasies wat geleidelik van 'n nat klimaat (Molteno- en Elliot-formasie) na 'n woestynklimaat (Clarens-sandsteenformasie) oorgaan.

Die Stormberg-groep word in die volgende drie formasies opgedeel:

Die Clarens-formasie is die jongste formasie van die Stormberg-groep en oorlê die Elliot-formasie. Dit bestaan uit geel-wit, fynkorrelrige sandsteen, sanderige sliksteen en moddersteen, en verteenwoordig 'n eoliese afsetting (wind), wat gevorm word deur sandduine in 'n woestynklimaat. In natter dele van die kom word vlak meer- en rivierafsetting gevind, wat 'n komplekse interaksie van eoliese en fluviale sedimentasie veroorsaak. Die onderkant van die massiewe Clarens-formasiekranse het 'n rooierige skynsel as gevolg van yster afkomstig vanaf die Elliot-formasie.

Fossiele soos wurmboorsels en dinosourusvoetspore kan ook in die Clarens-formasie gesien word. 'n Bekende stel voetspore kan naby die dorp Ficksburg in die Oos-Vrystaat gesien word.

Die Clarens-formasie vorm die bekende kranse van die berge in veral die Oos-Vrystaat, waarvan Soutkop en Imperani buite Ficksburg, Visierskerf naby Fouriesburg, die Brandwag Rots by die Golden Gate Nasionale Park en Platberg naby Harrismith veral bekend is.

Die Elliot-formasie oorlê die Molteno-formasie en is jonger. Dit bestaan hoofsaaklik uit afwisselende dun lae rooi moddersteen en sliksteenrooi wat in vloedvlaktes gevorm het. Die Elliot-formasie verteenwoordig dus 'n fluviale afsetting. Dit bevat ook verskeie fossiele, soos die 12 meter lange Melanorosaurus.

Aan die bokant van die formasie word eoliese sedimente gevind, wat 'n aanduiding is van die toenemend droërwordende omgewing.

Die Molteno-formasie is die oudste formasie van die Stormberg-groep en is gevorm uit riviersand van Triassiese ouderdom. Dit is blootgestel deur verwering en kan gesien word as kranse in die Drakensberge. Die Molteno-fromasie kan maklik uitgeken word aan sy skitterende voorkoms, wat veroorsaak word deur klein kwartskristalle wat die sandkorrels saambind.