Stroop (rolprent)

in Wikipedia, die vrye ensiklopedie
Jump to navigation Jump to search
Stroop
STROOP-film.jpeg
Regisseur Susan Scott
Vervaardiger Bonné de Bod
Susan Scott
Verteller Bonné de Bod
Uitgereik September 2018 (San Francisco Groen Rolprentfees)
Land Suid-Afrika
Taal Afrikaans (met Engelse onderskifte)
Amptelike webtuiste

STROOP - journey into the rhino horn war is 'n onafhanklike, Afrikaanse dokumentêre rolprent uit 2018 met Engelse onderskrifte, wat handel oor die renosterhoringstroperykrisis in Suid-Afrika. Dit is gemaak deur Bonné de Bod, omgewingsjoernalis en televisie-aanbiedster, en Susan Scott, 'n rolprentvervaardiger. Dit word aangebied deur De Bod en sluit ook die deelname van Jane Goodall, Karen Trendler en Trang Nguyen in. Die rolprent se première was by die San Francisco Groen Rolprentfees in September 2018 voordat dit aan teaters in Suid-Afrika vrygestel is. Dit het verskeie toekennings wêreldwyd gewen en is internasionaal vrygestel op 12 Februarie 2019.

Agtergrond[wysig | wysig bron]

Tydens 'n verfilming van 'n opname vir die omgewingsprogram, 50/50, het Susan Scott aan Bonné de Bod gesê om tussen die karkasse van twee gestroopte renosters te gaan sit sodat dit op film vasgelê kon word. Talle emosies en vrae het De Bod oorweldig, en dis daar waar die idee vir 'n dokumentêr oor die renosterstropingskrisis om aan die publiek te wys wat regtig aangaan, gebore is.

STROOP is 'n onafhanklike film wat met die hulp van gemeenskapsfinansiering die lig gesien het. Voordat De Bod en Scott volstoom daaraan begin werk het, het hulle besluit om geen borge te soek om hulle finasieel by te staan nie. Hulle wou die naakte waarheid vertel, sonder dat iemand vir hulle voorskryf of verplig om dele uit die rolprent te sny. Dit was aanvanklik 'n sesmaande-projek, maar uiteindelik het De Bod en Scott renosterstropery vier jaar lank intensief ondersoek en gepoog om die geheime van die donker wêreld van renosterstropery bloot te lê, die ware feite, sonder sensors. Hulle wou hê dat niemand meer kan sê dat hulle nie geweet het wat aangaan nie.

Storie[wysig | wysig bron]

Die dokumentêr plaas die fokus op plaaslike wildsparke en renosterplase en hoe hulle renosterstropery probeer beveg. Hulle verfilm die spesiale veldwagterseenhede in die Krugerwildtuin en die Hluhluwe-iMfolozipark, waar hulle grutonele van renosterkarkasse ontdek wat wreed geslag en vermink is vir hulle horings.

Die twee ondersoek ook onder andere beskermingsmaatreëls, pogings om renosterwesies te red, forensiese spanne, die misdaadtonele, Suid-Afrika se somtyds kriminele regsstelsel, en die hofproses. Hulle waag hul lewens om die onwettige smokkel van, en handel in, renosterhorings in China en Viëtnam onder 'n dekmantel te ondersoek, om te probeer uitvind waarom mense steeds bly glo dis die wonderkuur vir talle siektes soos kanker.

Toekennings[wysig | wysig bron]

STROOP is oral goed ontvang en is met verskeie internasionale en plaaslike toekennings beloon:[1]

  1. "Green Tenacity" - San Francisco Groen Filmfees
  2. "Spirit of Action" - Santa Cruz Filmfees
  3. Beste dokumentêr - San Pedro Internasionale Filmfees
  4. Beste Vroue-filmmaker - Glendale Internasionale Filmfees
  5. Spesiale Fokus: Dokumentêr - LA Femme Internasionale Filmfees
  6. Beste Dokumentêr - San Diego Internasionale Filmfees
  7. Beste Internasionale Dokumentêr - Mystic Filmfees
  8. Nuweling - Wildlife Filmfees Rotterdam
  9. Beste Dokumentêr/Moedig- toekenning - Berlin Courage Filmfees
  10. Beste Dokumentêr - Hollywood Internasionale Onafhanklike Dokumentêre Toekennings
  11. Uitmuntende Vertelling - Hollywood Internasionale Onafhanklike Dokumentêre Toekennings
  12. Uitmundende Redigering - Hollywood Internasionale Onafhanklike Dokumentêre Toekennings
  13. Beste Vroulike Filmmakers, Uitnemendheid - Hollywood Internasionale Onafhanklike Dokumentêre Toekennings
  14. Uitnemendheid:Spesiale vermelding: Dokumentêr - Impact DOCS-toekennings
  15. Beste Vollengte Film: Beste van Fees - Internasionale Wildlewe Filmfees
  16. Genesis Toekenning - Brigitte Bardot Internasionale Dokumentêre Film
  17. Beste Dokumentêr - Ekurhuleni Internasionale Filmfees
  18. Beste Dokumentêr; Beste Redigering - Tulum Wêreld Omgewings-fees
  19. Naaswenner: Politiese, Ondersoekende en Wetlike Ondersteunings-kategorie - Renoster Bewaringstoekennings
  20. Groeptoekenning vir beduidende bydra - WESSA-toekennings
  21. Video langformaat - SAB Omgewingstoekennings
  22. Omgewingsmedia-toekenning - Beste TV-joernalis (Bonné de Bod en Susan Scott) - SANParke Kudu[2]Toekennings
  23. Beste Skrywer - Gauteng Filmkommisie: Skrywersgilde van Suid-Afrika
  24. Beste Natuur- en Omgewingsprogram - SAFTA (Suid-Afrikaaanse Film en Televisie-toekennings)
  25. Erepenning - SA Akademie vir Wetenskap en Kuns

Verder was STROOP ook genomineer vir die 'Beste dokumentêr'-toekennings by die Wellington Onafhanklike Filmfees, die Lone Star Internasionale Filmfees en die Riviera Internasionale Filmfees, asook die 'Beste aanbieder/gasheer'- en 'Beste Impak-film'-toekennings by die Jackson Wild Filmfees.

STROOP is aan veldwagters en personeel van die Nasionale Krugerwildtuin en aan hoërskole en universiteite in Suid-Afrika, Europa en die VSA vertoon. Die teatervertonings in sestien teaters in Suid-Afrika was 98% uitverkoop. Daar was spitstyd televisie-uitsendings van die rolprent in Europa, Asië, Amerika, Suid-Afrika en Afrika. Verder is die rolprent digitaal versprei deur onder andere Apple iTunes, Amazon en DStv Showmax in meer as 80 lande en is in meer as sewe tale vertaal: Engels, Afrikaans, Kantonees, Duits, Frans, Italiaans, Pools en Manderyns.

Verwysings[wysig | wysig bron]

  1. https://m.imdb.com/title/tt855805/awards[dooie skakel]
  2. "'Stroop' skenk jongste kontantprys aan honde-eenheid". Maroela Media. 4 Desember 2019. Geargiveer vanaf die oorspronklike op 31 Desember 2019. Besoek op 5 Desember 2019.

Bronne[wysig | wysig bron]

  • Bewakers van die ou grotes - Lydia van der Merwe (Sarie-tydskrif: Februarie 2016)
  • Skoonheid en renosters - Lydia van der Merwe (Sarie-tydskrif: Julie 2018)
  • The women behind award winner - Mariana Balt (White River Post: 24 Januarie 2019)
  • 'Stroop' kry 20ste kroon (Maroela Media: 16 Julie 2019)
  • Bekroonde renosterdokumentêr op die kleinkassie te sien (Maroela Media: 14 Augustus 2019)
  • Nóg 'n prys vir 'STROOP', omgewingsbewuste in dié dokumentêr (Maroela Media: 14 November 2019)
  • Stroop: Journey into the Rhino Horn War - Awards - IMDb
  • Award-winning STROOP now available via download (africageographic.com: 13 Februarie 2019)
  • Kyk bekroonde SA dokumentêr aanlyn (Maroela Media: 21 Februarie 2019)
  • Breaking Boundaries: SA rhino film airs in Hong Kong (Rising Sun Chatsworth: 25 Februarie 2019)

Eksterne skakels[wysig | wysig bron]