Suid-Afrikaanse Klas 20E

in Wikipedia, die vrye ensiklopedie
Jump to navigation Jump to search
Suid-Afrikaanse Klas 20E
Class 20E (20 002).jpg
No. 20-002 & 20-003 word van die Punt in Durban na die Umbilo elektriese lokomotiefdepot verskuif
14 November 2013
Tipe en oorsprong
Kragtipe Elektries
Ontwerper Zhuzhou Electric Locomotive Co. Ltd.
Vervaardiger Zhuzhou Electric Locomotive Co.
CSR Zhuzhou-Matsetse Basadi
Model ZELC 20E
Klas 20E
Vervaardig 2013–2015
Aantal gebou 95
Bouspesifikasies
UIC wielklassifikasie Bo-Bo
Spoorbreedte Kaapspoor
Bogies 2 700 mm
Lengte 18 268 mm
Breedte 2 950 mm
Hoogte 3 850 mm pantograwe neer
Asbelasting 21 870 kg
Lokomotiefmassa 86 368 kg
Kragverkryging Pantograaf
Traksiemotors Vier
Werkverrigting
Maksimumspoed 100 km/h
Lokomotiefremme Elektro-pneumaties
Heropwekkende en reostatiese remme
Treinremme Lugremme
Lokoremkrag 250 kN
Diensgeskiedenis
Gebruiker Transnet Freight Rail
Kragklas Beide 3 kV GS & 25 kV WS
Aantal in klas 95
Vlootnommer(s) 20-001 tot 20-095
Bynaam China Doll
Afleweringsdatum 2013-
Eerste tog 2013

Die Suid-Afrikaanse Klas 20E van 2013 is 'n Suid-Afrikaanse elektriese lokomotief van die Transnet Freight Rail-era.

In Augustus 2013 is die eerste van vyf-en-negentig Klas 20E-dubbelspanning elektriese lokomotiewe vir Transnet Freight Rail op sy onderstel laat sak in Changsha, China.[1] Tien van dié lokomotiewe is deur die Zhuzhou Electric Locomotive Co., Ltd. in China gebou,[2] en die res is deur 'n konsortium in Suid-Afrika gebou.

Vervaardiging[wysig | wysig bron]

Die eerste tien (van 95) 3 kV gs/25 kV ws dubbelspanning Klas 20E-elektriese lokomotiewe vir Transnet Freight Rail is in China gebou deur Zhuzhou Electric Locomotive Company, 'n filiaal van die China South Locomotive and Rolling Stock (CSR), China se voorste treinvervaardiger.[1] Die eerste twee van hierdie lokomotiewe, no. 20-002 en 20-003, is by Durbanhawe afgelaai op 14 November 2013. 'n Verdere drie, no. 20-001, 20-004 en 20-005 het op 18 Desember 2013 in Suid-Afrika aangekom.

Die kontrak dui op Zhuzhou se grootste enkele oorsese bestelling van elektriese lokomotiewe tot op hede. Die kontrak maak voorsiening vir die maatskappy om elektriese lokomotiefvervaardigingstegnologie na Suid-Afrika uit te voer, en dus 'n plaaslike produksieverhouding van meer as 60 persent te bereik.[3]

'n Klas 20E-vervaardigersplaatjie

Die bekendstellingseremonie van die eerste lokomotief, no. 20-001, het op 20 Augustus 2013 by die fabriek in Changsha in Sentraal-China se Hunanprovinsie plaasgevind.[2] Van die oorblywende 85 lokomotiewe is die nommers 20-011 tot 20-025 aanmekaar gesit uit die Chinese boustelle deur Transnet Engineering in Koedoespoort, en hierdie 15 is almal aan die einde van September 2014 in diens gestel deur Transnet Freight Rail.[4]

Die res van die bestelling het groter plaaslike inhoud vereis en is in Koedoespoort in Suid-Afrika gebou deur 'n konsortium wat bestaan uit CSR Zhuzhou en die Suid-Afrikaanse Swart Ekonomiese Bemagtigingsonderneming Matsetse Basadi. Die eerste hiervan, nr. 20-026, is aan die einde van September 2014 in diens gestel.[1]

Eienskappe[wysig | wysig bron]

Die lokomotiefbakwerk bestaan uit 'n gesweisde eenheidsontwerp, gebou van staalplate en profieldele, met 'n druksterkte van 4,45 meganewton en 'n treksterkte van 4 meganewton.[5] Die Klas 20E het 'n enkelkajuit met 'n loopgang in die middel van die lokomotief. Dit is toegerus met 'n draadlose datatransmissiestelsel wat die lokomotief se werkingstatus, foutdata en energieverbruikdata via GSM en Wi-Fi vir ontleding na 'n stasie stuur. Dit is ook toegerus met 'n astemperatuuralarmtoestel, brandalarmstelsel, kringtelevisiestelsel (CCTV), wielflenssmeertoestel en, as 'n personeelveiligheidsmaatreël, hoëspanningbeskermende sluittoestelle. Die WS-traksiemotors word beheer deur geïsoleerde-hek bipolêre transistors (IGBT).[5]

Dubbelspanning-bruikbaar[wysig | wysig bron]

Onder 25 kV WS/50Hz lynspanning is die elektriese stelsel ontwerp om teen 'n maksimum van 31 kV en 'n minimum van 17 kV te opereer, terwyl dit onder 3 kV GS ontwerp is om teen 'n maksimum van 4 kV en 'n minimum van 2 kV te werk.[5][6]

Soos op die dubbelspanningklas 19E, word die hoofelektriese stroombaan outomaties gekies in WS- of GS-modus, gebaseer op die spanning van die oorhoofse kontakdraad wat die lokomotief voed. Om outomatiese probleemvrye in-rit-oorskakeling te vergemaklik, is die lokomotief met aanboordspanningsverklikkers toegerus, terwyl die oorhoofse draad toegerus is met twee houtisolators en 'n neutrale draad van 3 meter om die WS- en GS-voeding te skei. Die neutrale seksie is aan die treinspoor gekoppel wat dien as teruggeleier op geëlektrifiseerde lyne.

Uitleg[wysig | wysig bron]

Die lokomotief het 'n enkelkajuit met 'n middelgang na agter. Die binne-uitleg en plasing van toerusting is soos volg, van agter die kajuit na agter:

Linkerkant
  • Lugverkoeler.
  • Laespanninghokkie.
  • Batteryhokkie.
  • Diensingangsportaal en deur.
  • Trekkragomskakelaar hokkie 1.
  • Koeltoring 1.
  • Kragtoevoerhokkie.
  • Trekkasmotorblaser 2.
  • Remweerstand.
  • Toilet, met 'n porta-potty en handwasbak.
Regterkant
  • Seinhokkie.
  • Trekkragmotorblaser 1.
  • Masjienventilasieblaser.
  • Koeltoring 2.
  • Trekkragomskakelaar hokkie 2.
  • Hoogspanninghokkie.
  • Hoofkompressor.
  • Remhokkie.
Onderbuik
  • Hooftransformator.
  • Twee hulptransformators.

Diens[wysig | wysig bron]

Die Klas 20E-lokomotiewe het heropwekkende en reostatiese remme, 'n maksimum snelheid van 100 km/h, en is toegerus met lae-spoed beheer. Die eenhede het radiofrekwensieverspreide kragtegnologie, wat hulle ook in staat sal stel om in die middel van 'n lang trein te trek.[7]

Ná plaaslike toetse, is die tien Chineesgeboude lokomotiewe in Maart 2014 in diens gestel op die nuwe mangaanertslyn tussen Sishen en Port Elizabeth via Kimberley, De Aar en Noupoort.[1]

Twee Klas 20E-lokomotiewe, nommers 20-031 en 20-032, is gekies om gebruik te word op die Bloutrein en is in die gebruiklike blou kleurskema geverf. In Bloutreindiens (sedert vroeg in 2015) vervang hulle die voorheengebruikte Klas 18E op GS-lyne en die Klas 7E op WS-lyne landwyd.

Voorbeelde geïllustreer[wysig | wysig bron]

Foto's van die tweede groep lokomotiewe wat afgelaai is van die drywende kraan "Indlovu" by die O-loods in Durbanhawe op 18 Desember 2013.

  • No. 20-004 en 20-005 by O-skuur in die Durbanse Hawe op 18 Desember 2013

  • No. 20-001

  • No. 20-004

  • Die Bloutrein se nuwe eenhede 20-032 en 20-031, Bellville, 4 Julie 2017

  • No. 20-014 by Beaconsfield, Kimberley op 7 Oktober 2015

  • No. 20-061 te De Aar, Noord-Kaap op 9 Oktober 2015

Verwysings[wysig | wysig bron]

  1. ↑ 1,0 1,1 1,2 1,3 Railways Africa, 20 Aug 2013: Class 20E Loco Debuts at CSR
  2. ↑ 2,0 2,1 Xinhuanet English News 2013-08-20 - First electric locomotive to be exported to Africa
  3. ↑ Xinhuanet English News 2012-10-24 - CSR signs locomotive deal with South Africa's Transnet
  4. ↑ Railways Africa, 11 November 2014: Transnet se Klas 20E (en)
  5. ↑ 5,0 5,1 5,2 Class 20E manual: Part 1: Locomotive Profile and Technical Data
  6. ↑ Class 20E Traction Systems - Difference between AC & DC Traction Systems. Opleidingsdokument deur Transnet Engineering saamgestel, 2014.
  7. ↑ Railways Africa, 26 Nov 2013: Class 20E Locos Arrive
Ontsluit van "https://af.wikipedia.org/w/index.php?title=Suid-Afrikaanse_Klas_20E&oldid=2122207"