Suid-Kaliforniese veldbrande van Januarie 2025

Sedert 7 Januarie 2025 is die Los Angeles-metropolitaanse gebied en omliggende gebiede in Suid-Kalifornië, insluitend Pacific Palisades, Eaton, Hurst en Sunset, deur 'n reeks brande getref. Minstens 24 mense is in die brande dood, meer as 10 000 huise is vernietig, meer as 2 000 huise is beskadig en meer as 130 000 mense is gedwing om te ontruim. Dit is deur die Amerikaanse president Joe Biden as die “mees vernietigende” brande in die geskiedenis van Kalifornië beskryf.
Brande
[wysig | wysig bron]Tussen 7 en 10 Januarie het 'n groot aantal brande uitgebreek wat weens sterk wind vinnig versprei het. Sommige van hierdie brande het wydverspreide vernietiging veroorsaak. Baie akteurs se eiendomme is vernietig, insluitend dié van Mandy Moore, Cary Elwes, Eugene Levy, Billy Crystal, Paris Hilton, Adam Brody, Leighton Meester, Anthony Hopkins, Jeff Bridges, John Goodman, Miles Teller, James Woods, Mel Gibson, Diane Warren, Mark Hamill, Ricki Lake en Ed Harris.[1]
Palisades-brand
[wysig | wysig bron]Die Palisades-brand het op 7 Januarie in die Santa Monica-berge naby die Pacific Palisades-woonbuurt begin. Hierdie brand het vinnig na Pacific Palisades en die nabygeleë stad Malibu versprei en ten minste 4 000 geboue vernietig of beskadig.[2]
Eaton-brand
[wysig | wysig bron]Die Eaton-brand het op 7 Januarie in Eaton Canyon, noord van Altadena, begin en het teen die volgende oggend tot 'n omvang van 40 vierkante km gegroei. Die brand het 'n groot deel van Altadena vernietig, waar meer as 6 500 geboue afgebrand het.
Oorsake
[wysig | wysig bron]Die winters van 2023 en 2024 was baie nat, wat oorstromings veroorsaak het en plantegroei bevorder het. Daarteenoor het daar van 1 Julie 2024 tot 5 Januarie 2025 slegs sowat 4 millimeter reën oor Los Angeles geval. Dit het 'n ernstige droogte en 'n uiterste brandrisiko geskep. Die verspreiding van die brande is deur uiters ongunstige weerstoestande vererger. Die vure is aangewakker deur die Santa Ana-wind, 'n warm, droë woestynwind wat 'n algemene verskynsel in Suid-Kalifornië gedurende die herfs en winter is. Die rukwinde het snelhede van 160 km/h bereik, wat die brande van suurstof voorsien het en die ingryping van waterbomwerpers en helikopters verhoed het, wat die rampe aansienlik vererger het.
Kyk ook
[wysig | wysig bron]Verwysings
[wysig | wysig bron]- ↑ "Celebrities among those who lost homes as devastating Los Angeles fires" (in Engels). Associated Press. 9 Januarie 2025. Besoek op 12 Januarie 2025.
- ↑ "Eaton Fire: Incident Update on 01/08/2025 at 10:36 AM | CAL FIRE". www.fire.ca.gov. Besoek op 11 Januarie 2025.