Susanna M. Salter
 | Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
| Susanna M. Salter | |
 Salter in 1887 | |
Burgermeester van Argonia, Kansas
| |
| Ampstermyn April 4, 1887 – April 8, 1888 | |
| Voorafgegaan deur | William H. Watson |
|---|---|
| Opgevolg deur | J. S. Baughman |
Persoonlike besonderhede
| |
| Gebore | 2 Maart 1860 Lamira, Ohio |
| Sterf | 17 Maart 1961 (ouderdom 101 jaar) Norman, Oklahoma |
| Politieke party | Verbodsparty |
| Kind(ers) | 9 |
| Alma mater | Kansas Staat Universiteit; Kansas Staat Landboukollege |
Susanna Madora Salter (née Kinsey; 2 Maart 1860 – 17 Maart 1961) was 'n Amerikaanse politikus en aktivis. Sy het gedien as burgemeester van Argonia, Kansas, van 1887 tot 1888, en was die eerste vrou wat verkies is om as burgemeester in die Verenigde State te dien en een van die eerste vroue wat in enige politieke amp in die Verenigde State gedien het.
Vroeë lewe en opvoeding
[wysig | wysig bron]Susanna Madora Kinsey is gebore op 2 Maart 1860, naby die nie-geïnkorporeerde gemeenskap van Lamira in Smith Township, Belmont County, Ohio. Sy was die dogter van Oliver Kinsey en Terissa Ann White Kinsey, afstammelinge van Kwaker-koloniste van Engeland.
Op die ouderdom van 12 jaar het sy saam met haar ouers na Kansas verhuis en op 'n 80-akker (32 hektaar) plaas naby Silver Lake gevestig. In 1878 het sy die Kansas Staat Landboukollege (hedendaagse Kansas Staat Universiteit) in Manhattan betree. Sy is toegelaat om haar eerstejaarsjaar oor te slaan, nadat sy op hoërskool kursusse op universiteit geneem het. Sy moes egter ses weke voor haar gradeplegtigheid weens gesondheidsredes, noodgedwonge, haar studies staak.
Terwyl sy 'n student was, het sy Lewis Allison Salter ontmoet, 'n aspirant-prokureur en die seun van die voormalige luitenant-goewerneur van Kansas, Melville J. Salter. Hulle het kort daarna in die huwelik getree en na Argonia verhuis, waar sy aktief was in die plaaslike 'Woman's Christian Temperance Union' en Verbodsparty organisasies, en kennis gemaak het met die nasionaal bekende matigheidsaktivis Carrie Nation.
In 1883 het sy geboorte geskenk aan die eerste baba wat in Argonia gebore is, Francis Argonia Salter. Lewis en Susanna Salter het altesaam nege kinders gehad, van wie een tydens haar ampstermyn as burgemeester gebore is en in die kinderjare gesterf het. Ná die stad se inlywing in 1885 is haar pa en man onderskeidelik as die stad se eerste burgemeester en stadsklerk verkies.
Burgemeester
[wysig | wysig bron]
Salter is op 4 April 1887 tot burgemeester van Argonia verkies. Haar verkiesing was 'n verrassing omdat haar naam op 'n lys van kandidate geplaas is as 'n grap deur 'n groep mans wat gehoop het om 'n verlies te verseker wat vroue sou verneder en hulle sou ontmoedig om aan politiek deel te neem.[1] Aangesien kandidate destyds nie voor die verkiesingsdag openbaar gemaak hoef te geword het nie, het Salter self nie geweet sy was op die stembrief voor die stembus geopen het nie. Toe sy op die verkiesingsdag self ingestem het om die amp te aanvaar indien verkies, het die 'Women's Christian Temperance Union' sy eie voorkeurkandidaat laat vaar en massaal vir Salter gestem. Daarbenewens het die plaaslike Republikeinse Party-voorsitter 'n afvaardiging na haar huis gestuur[2] om te bevestig dat sy sou dien. Die Republikeine het gevolglik ingestem om vir haar te stem, wat toe gehelp het om haar verkiesing met 'n tweederdemeerderheid te verseker.
Salter het wel bepaalde faktore tot haar voordeel gehad voordat hy die amp van burgemeester beklee het. Haar pa was die eerste burgemeester van die dorp, en haar skoonpa het gedien as luitenant-goewerneur van Kansas.[3] Alhoewel haar termyn sonder groot gebeurtenisse was, het haar verkiesing nasionale belangstelling van die pers ontlok, en het dit 'n debat ontketen oor die haalbaarheid van ander dorpe wat Argonia se leiding volg. Besware het gewissel vanaf die "onderrok-reël" tot "wag-en-sien"-houdings.
Een van die eerste stadsraadsvergaderings waartydens die nuutverkose burgemeester Salter voorgesit het, was deur 'n korrespondent van die New York Sun bygewoon. Hy het in sy berig die burgemeester se rok en hoed beskryf en daarop gewys dat sy met groot ordentlikheid ('decorum') voorgesit het. Hy het opgemerk dat sy verskeie kere irrelevante besprekings beperk het, wat aangedui het dat sy 'n goeie parlementariër was. Publisiteit het ook uitgebrei na koerante so ver as Swede en Suid-Afrika. As vergoeding vir haar jaar se diens is sy een dollar (ongeveer $35) betaal. Na 'n jaar in die amp het sy haarself nie weer verkiesbaar gestel nie.
Persoonlike lewe
[wysig | wysig bron]Na haar termyn as burgemeester het Salter en haar gesin in Argonia bly woon, tot 1893 toe haar man grond op die Cherokee-strook in Alva, Oklahoma (toe Oklahoma-gebied ) bekom het. Tien jaar later het hulle na Augusta in 'Woods County', in die Oklahoma Gebied, verhuis, waar haar man in die regte gepraktiseer het en die Headlight -koerant gestig het.
Hulle het uiteindelik by die stad se setlaars aangesluit deur na Carmen, Oklahoma, te verhuis. Na afloop van haar man se afsterwe in 1916 het sy na Norman, Oklahoma, verhuis en haar jonger kinders vergesel tydens hul studies aan die Universiteit van Oklahoma. Sy het vir die res van haar lewe in Norman gewoon en 'n belangstelling in godsdienstige en politieke aangeleenthede behou, maar het nooit weer 'n verkose amp gesoek nie.[4]
Afsterwe
[wysig | wysig bron]Salter is op 17 Maart 1961 in Norman, Oklahoma, twee weke na haar 101ste verjaardag, oorlede en is saam met haar man in Argonia begrawe.
Eerbewyse
[wysig | wysig bron]In 1933 is 'n brons gedenkplaat in Argonia se openbare plein geplaas ter ere van Salter se diens as die eerste vroulike burgemeester in die Verenigde State.
Die huis waarin sy gedurende haar ampstermyn as burgemeester gewoon het, is in September 1971 by die Nasionale Register van Historiese Plekke gevoeg.
Sy is die onderwerp van die kinderboek A Vote for Susanna: The First Woman Mayor (2021).
Verwysings
[wysig | wysig bron]- ↑ Burrell, Barbara (2017). Women and Politics: A Quest for Political Equality in an Age of Economic Inequality. United Kingdom: Taylor & Francis. p. 214. ISBN 9781317516279. Besoek op 5 Augustus 2021.
- ↑ "Susanna Madora Salter profile". emilytaylorcenter.ku.edu. 22 Mei 2013. Geargiveer vanaf die oorspronklike op 23 Oktober 2017. Besoek op 10 April 2017.
- ↑ "Susanna Madora Salter" Archived 2017-10-23 at the Wayback Machine. Emily Taylor Center for Women & Gender Equity website; retrieved July 5, 2016.
- ↑ AMERICA'S FIRST WOMAN MAYOR
