Swart week

in Wikipedia, die vrye ensiklopedie
Spring na: navigasie, soek

Swart week (Engels: Black Week; Afrikaans en Nederlands:Triomfweek) verwys na 'n tragiese week vir die Britse magte tydens die Tweede Vryheidsoorlog van 10 tot 15 Desember 1899. Die Britte het 'n reeks nederlae gely by Magersfontein, Stormberg en Colenso.

By die Slag van Stormberg op 10 Desember, het die Britse Generaal Sir William Gatacre in bevel van 3 000 troepe om die Boerinvalle in die Kaapkolonie te verjaag, probeer om 'n spoorwegaansluiting omtrent 50 myl (80 km) suid van die Oranjerivier te buit. Maar Gatacre probeer om die Oranje-Vrystaat boere se stellings aan te val deur teen 'n styl rotshang uit te klim. Hy verloor 135 dooie en gewonde soldate asook twee kanonne in die geveg, en meer as 600 Britse troepe word deur die Boere krygsgevange geneem.

By die Slag van Magersfontein op 11 Desember het 14 000 Britse troepe onder bevel van Luitenant-Generaal Methuen probeer om hulle weg oop te veg om Kimberley te bevry. Die Boere se aanvoerders, Generaals Koos de la Rey en Piet Cronje, het egter 'n plan bedink waarvolgens loopgrawe op 'n ongewone plek gegrawe is om die Britte te flous en die boerskutters groter vuurreik te gee. Die plan het gewerk. Die Britte is beslissend verslaan met 120 Britse soldate dood en 690 gewond, wat hulle verhoed het om die beleërings van Kimberley en Mafeking te beëindig.

Maar die laagtepunt van Swart-week vir die Britte was die Slag van Colenso op 15 Desember toe 21 000 Britse troepe, onder bevel van Redvers Buller, probeer het om die Tugelarivier oor te steek om Ladysmith te bevry waar 8 000 Transvaalse Boere, onder bevel van Generaal Louis Botha, hulle ingewag het. Deur 'n kombinasie van artillerie en akkurate geweervuur het die Boere die Britse pogings om die rivier oor te steek suksesvol beveg. Die Britte het 'n verdere 1 127 ongevalle gely. Hulle is ook tydens die terugval gedwing om 10 kanonne agter te laat wat die Boere gebuit het nadat hulle slegs 40 ongevalle gely het.