Sydney Kumalo

in Wikipedia, die vrye ensiklopedie
Jump to navigation Jump to search
Sydney Kumalo
Geboortenaam Sydney Alex Kumalo
Gebore (1935-04-13)13 April 1935
Sophiatown, Johannesburg, Transvaal, Unie van Suid-Afrika
Sterf 11 Februarie 1988 (op 52)
Soweto, Johannesburg, Transvaal, Suid-Afrika
Nasionaliteit Suid-Afrika
Veld Beeldhouwerk
Opleiding Polly Street Kunssentrum in Johannesburg
Beweging Tradisionele Afrikakuns, Ekspressionisme
Beïnvloed deur Edoardo Villa, Cecil Skotnes
Beïnvloed Ezrom Legae

Sydney Alex Kumalo (13 April 1935 – 11 Februarie 1988) was 'n Suid-Afrikaanse kunstenaar.[1] Hy is in Sophiatown, Johannesburg gebore. Hy het sy skoolopleiding in Mandibane ontvang en sy basiese kunsopleiding aan die Polly Street Kunssentrum in Johannesburg. Daar het hy onder Cecil Skotnes, toe kunsdirekteur van die sentrum, gestudeer. Later het Kumalo as Edoardo Villa se assistent gewerk. In 1960 is Kumalo as kunsinstrukteur by die Pollystraatsentrum aangestel en kort daarna het hy Cecil Skotnes se pos vier jaar lank beklee voordat hy hom voltyds aan beeldhou gewy het.

Sydney Kumalo het die tradisionele Afrika-kuns met die idees van die Ekspressioniste gekombineer en daaruit 'n oorspronklike styl ontwikkel. Sy beeldhouwerk het die kenmerkende plastisiteit en simboliek van Afrika-kuns. Aan die een kant vertoon sy werk die magiese elemente van die Afrika-kultus van voorvaderlike en bose geeste (soos sy mens-dier-figure) en aan die ander kant, hoewel aards, beeld sy figure weer die mens se strewe na geestelike vervulling uit. Sy beeldhouwerk word opgebou uit geometriese vlakke en bestaan hoofsaaklik uit dinamiese en verwronge figure. Hy werk hoofsaaklik met terracotta en laat sy stukke dikwels onafgewerk om die skaduwerking te verhoog. Twee temas wat hy deurgaans behandel, is die mens en die dier.

Sydney Kumalo was een van die eerste swart Suid-Afrikaanse kunstenaars wat wêreldroem verwerf het. Hy het in 1963 lid geword van die Amadlozi-groep ("Gees van ons vaders"). Ander lede van dié groep was Cecil Skotnes, Cecily Sash, Edoardo Villa en Ezrom Legae. Hy het in 1963 en 1964 saam met dié groep in Rome, Milaan, Venesië en Florence uitgestal.

Hy het ook in 1965 en 1966 aan groepuitstallings in Londen deelgeneem en van sy werk is op die Venesiese Biënnale en die Sao Paulo-Biënnale ten toon gestel. Hierbenewens het hy ook in die VSA, Nederland en Australië uitgestal. Van sy openbare opdragte is Stasies van die Kruis vir 'n kerk in Orlando, Biddende vrou in die Staatspaviljoen, Milnerpark, Johannesburg, en 'n beeld van 'n arend vir 'n hotel in Kitwe, Zimbabwe. Hy het aan verskeie groepuitstallings in Suid-Afrika deelgeneem en gereeld alleen uitgestal. Sy werk is opgeneem in die Suid-Afrikaanse Nasionale Kunsmuseum in Kaapstad, die Durbanse Kunsmuseum, die Rembrandt-versameling en in die Schlesinger-organisasie se versameling.

In 1988 is hy in die Chris Hani Baragwanath-hospitaal in Soweto oorlede.

Verwysings[wysig | wysig bron]

  1. (en) Sydney Kumalo – Revisions. URL besoek op 10 September 2019.

Bronnelys[wysig | wysig bron]