T-klas duikboot

in Wikipedia, die vrye ensiklopedie
Jump to navigation Jump to search
HMS Thorn

Die T-klas duikbote was 'n klas diesel/elektriesaangedrewe duikbote van die Britse Vloot wat tydens die Tweede Wêreldoorlog en daarna diens gedoen het. Hierdie klas is bekend vir die HMS Thetis-ramp van 1939. Die klas is in die 1930's geskep om die O, P en R klasse te vervang. Dit was die eerste Britse duikbote waar die brandstoftenks binne die romp was. Dit het die probleem van lekkende brandstoftenks uitgeskakel; lekkende brandstof laat 'n streep op die oppervlakte van die see wat die duikboot se posisie weggee.

Die klas se ontwerp is grootliks beïnvloed deur die Londense Vlootooreenkoms van 1935 wat die grootte van duikbote en die aantal beperk het. Dit het byvoorbeeld 'n beperking geplaas op die fisiese grootte van die dieselenjins wat weer die duikboot se topspoed beïnvloed het. Die T-klas het twee ekstra torpedobuise gehad teenoor sy voorgangers. Die hele romp was ook gesweis; dus was die duikboot sterker en kon dieper duik. Daar was drie tipe dieselenjins geïnstalleer, Admiralty, Vickers en MAN. Toe die Tweede Wêreldoorlog egter uitbreek is MAN nie gebruik nie omrede dit 'n Duitse maatskappy was.

Een gros van die T-klas duikbote was toegerus met elf torpedobuise, een 20 mm lugafweerkanon en een 7,7 mm masjiengeweer.

T-klas duikbote in aksie[wysig | wysig bron]

HMS Tetrarch het 'n handelskip in die Noordsee aangeval en word toe self die teiken deur die skip se ondersteuningskepe. Hy duik tot op 120 m en bly daar vir 43 uur. HMS Triton het 'n Duitse konvooi aangeval en met 'n salvo van ses torpedo's tref hy die Friedenau, Wigbert en V1507 waarin 900 Duitse seemanne sterf. HMS Thistle loods 'n onsuksesvolle aanval op U-4 in April 1940 in die Noordsee; vier dae later verras U-4 vir Thistle en kelder hom met sy hele bemanning aan boord.

HMS Trenchant vier 'n volle salvo van agt torpedo's af op die Japannese kruiser Ashigara, vyf tref die kruiser en ruk die boeg oop wat 'n groot vuur veroorsaak voor hy sink. HMS Truant het skepe gekelder op die tuisfront, die Middellandse See asook die Verre Ooste. Hy het ongeveer 81 284 ton vyandelike skepe gesink. Voor dit was die Truant op pad terug vanaf Amerika waar dit 'n opgradering ondergaan het, toe hy 'n Noorweegse skip teëkom wat snaaks optree. Die Truant se kaptein ontdek toe dat die Noorweegse skip deur die Duitsers oorgeneem en bedryf word deur 'n klein bemanning. Ook aan boord was oorlewendes van die SS Braxby.

In Februarie 1945 het die HMS Tantalus die langste patrollie van die Tweede Wêreldoorlog voltooi van 55 dae waarin die duikboot 18,507 km afgelê het. In 1957 was die HMS Thorough die eerste duikboot wat om die wêreld gevaar het.

Tegniese besonderhede[wysig | wysig bron]

Besonderhede van die T-klas duikboot:
Item Statistiek
Verplasing (oppervlak) 1 326,9 metrieke ton
Verplasing (onderwater) 1 597,15 metrieke ton
Lengte 84,0 m
Breedte 8,1 m
Aandrywing (oppervlak) 2 x 1 864 kW diesel
Aandrywing (onderwater) 2 x 1 081 kW elektries
Spoed (oppervlak) 16,25 knope
Spoed (onderwater) 9,25 knope
Bemanning 55 persone
Wapens 10 x 457 mm torpedo buise
16 torpedos
10,1 cm kanon op dek

Bron[wysig | wysig bron]

  • THE ILLUSTRATED ENCYCLOPEDIA OF DESTROYERS FRIGATES & SUBMARINES, Bernard Ireland and John Parker, 2015, ISBN 978-0-85723-601-2