Tenement House

in Wikipedia, die vrye ensiklopedie
Jump to navigation Jump to search
Tenement House. In Skotland verwys die term tenement house anders as in die Verenigde State nie na 'n woonstelgebou in een van die armer woonbuurte van 'n stad nie, maar na middelklasbehuising. Vanaf die 1880's is rooi in plaas van grys sandsteen gebruik
Die kombuis was tradisioneel ook die werkplek van 'n woonstel
Die kombuis was Agnes Toward se gunstelingvertrek. Gedurende die koue wintermaande was dit 'n warm plek waar sy 'n bed naby die koolstoof gehad het. In Skotland is na hierdie soort beddens verwys as box bed, bed recess of hole-in-the-wall bed. In tenements, wat deur groot gesinne bewoon is, was daar gewoonlik nog 'n laai onderaan waarin baba's en kleuters moes slaap. Hierdie soort beddens is later, toe 'n maksimale getal bewoners per woonstel amptelik vasgelê is, om higiëniese redes verbied
Agnes Toward se teetafel in die parlour, 'n vertrek wat hoofsaaklik gebruik is om gaste te onthaal. Honger besoekers: die National Trust sou die beskuite en tert nie aanbeveel nie - hulle word net elke paar maande deur nuwes vervang!
Vir Agnes Toward en haar moeder was dit 'n voorreg om in 'n woonstel met 'n badkamer in te trek. Daar was selfs 'n eenvoudige stortbad. Nog tot in die 1960's en 1970's het rofweg die helfte van woonstelle in Glasgow nie oor hierdie gerieflikheid beskik nie. Bewoners was op openbare baddens aangewese
Koffers in die sitkamer. Reise na die buiteland was buite die finansiële bereik van die meeste Glasgowers. Agnes het na bestemmings in die Verenigde Koninkryk gereis. Mense uit die werkersklas het in plaas daarvan vaarte in plesierbote doon the watter geniet - op die River Clyde

Tenement House is 'n historiese museum in Glasgow, geleë in 'n woonstel van 'n sogenaamde tenement-woonstelgebou van 1892 met vier verdiepings. Die museum, wat deur die National Trust of Scotland bestuur word en sy deure sedert 2019 die hele jaar deur open (nog tot en met 2018 is dit gesluit gedurende die wintermaande), bestaan uit 'n uitstalling op die grondvloer wat die historiese ontwikkeling van tenement-behuising in Skotland dokumenteer, met historiese voorwerpe en dokumente soos kosrantsoeneringboeke, briewe, fakture en vakansiekiekies, en die museum op die eerste verdieping met outentieke historiese meubilering wat in die voormalige privaat woning van Agnes Toward ingerig is. Net die oorspronklike skitterende gaslampe is deur moderne elektriese beligting vervang. Andersins lyk die woonstel asof dit steeds deur Me. Toward bewoon sou word. So moet besoekers dan ook die deurklokkie lui sodat Trust-medewerkers (almal vrywilligers) hulle kan verwelkom in Me. Toward se privaat ryk.

Sy het die woonstel, wat oor 'n badkamer beskik ('n gerieflikheid wat destyds nog nie die algemene standaard was nie), tussen 1911 en 1965 bewoon, aanvanklik saam met haar moeder wat in 1939 oorlede is, en daarvan 'n tydkapsule van toeka se tyd gemaak deur die grootste deel van die oorspronklike meubilering en huisgereedskap onveranderd te laat. In 1965 is Agnes Toward, wat in haar laaste lewensjare aan dementia gely het, na 'n hospitaal geneem toe sy nie meer na haarself kon omsien nie. Sy is in Augustus 1975 oorlede.

Omrede Agnes Toward geen familielede meer gehad het wat haar woonstel sou kon ontruim het nie, is haar advokaat as eksekuteur aangestel om haar bates te hanteer. Toe hy en sy niggie Anna Davidson die woonstel betree het, was hulle verbaas dat dit blykbaar sedert die 1920's onveranderd gelaat is. Anna het 'n tyd lank self in die woonstel gaan woon en vervolgens museums en ander instellings in Glasgow genader wat moontlik belang sou stel in die woonstel.

Die woning en haar persoonlike besittings is uiteindelik deur die National Trust of Scotland gekoop. Die woonstel se meubilering en alle persoonlike besittings, insluitende briewe en ander dokumente, is deur die Trust gedokumenteer en gesorteer. 'n Deel daarvan maak deel uit van die uitstalling en museum wat sy deure in 1983 vir die publiek geopen het.

Eksterne skakels[wysig | wysig bron]

Amptelike National Trust-webtuiste van die museum

Biografie van Agnes Toward

Toerisme

Vloerplan

Media

Agtergrondinligting