Terug na Thaba
 | Hierdie artikel is nie in enige kategorie geplaas nie. |
Terug na Thaba is 'n Afrikaanse rolprent wat in 1977 vrygestel is.[1] Die film is deur Willie Alheit geregisseer en vervaardig deur Carfo Films.[1]
Sinopsis
[wysig | wysig bron]In Terug met Thaba word ons bekendgestel aan die Grobbelaar-gesin, eienaars van die plaas Thaba. Die oudste seun, André (Patrick Mynhardt), sy vrou, Louise (Christine Stevens), en hul seun, Gerhard (Josh du Toit), is vennote in verskeie drankwinkels in Pretoria. Hulle sien 'n geleentheid om baie geld te maak, maar dit behels oneerlikheid. Elmarie de Wet (Petru Wessels), die dogter van die gesin, en haar man, Tony (Louw Odendaal), sukkel om oor die weg te kom, en hul drie kinders ly daaronder. Te midde van hierdie probleme sterf hul moeder, Marie, en haar man, Gert Grobbelaar (Cornelis Esterhuyse), roep die kinders byeen vir die begrafnis. 'n Vriend van die Grobbelaars, dr. Pieter du Toit (Francois de Bruyn), is saam met sy vrou Joan (Iris Coertze) in Pretoria om hul dogter, Annet (Roelien Spruyt), vir 'n vakansie te gaan haal. Almal kom op die plaas bymekaar, en Gert Grobbelaar dra sy vrou se laaste versoek aan die familie oor: dat die ou wa waarmee die Grobbelaars se voorgeslag na Thaba gekom het, gerestoureer en aan 'n museum geskenk word. Die gebeure sentreer dan rondom die restourasie van hierdie wa.[1]
Rolverdeling
[wysig | wysig bron]Die rolverdeling is Patrick Mynhardt (as André), Christine Stevens (as Louise), Josh du Toit (as Gerhard), Petru Wessels (as Elmarie de Wet), Louw Odendaal (as Tony de Wet), Cornelis Esterhuyse (as Gert Grobbelaar), Francois de Bruyn (as dr. Pieter du Toit), Iris Coertze (as Joan du Toit), en Roelien Spruyt (as Annet du Toit).[1]
Verwysings
[wysig | wysig bron]- 1 2 3 4 Steyn, Christa. Die argivering van die Afrikaanse film (1916 – 2014). MA-verhandeling: Universiteit van die Vrystaat.