The Baths

Victoriaanse huis by The Baths, naby Citrusdal in die Olifantsriviervallei, Wes-Kaap, Suid-Afrika.

The Baths (ook Die Bad genoem) is 'n warmwaterbron naby Citrusdal.

Hierdie bron lê waar 'n nou kloof doodloop by 32°44′26.4″S 19°2′4.8″O, op die westelike oewer van die Olifantsrivier en 14 km suid van die dorp. Die kloof is dig begroei met inheemse bome. Daagliks lewer die bron 1½ miljoen liter water teen 42.8°C. Die water is smaakloos.

Die terrein rondom die bron is goed ontwikkel. Daar is swembaddens, rotspoele, vakansiehuise, kampeerplekke, wandelpaaie, 'n winkel en 'n restaurant.

In Oktober 1773 het die Sweedse plantkundige Carl Pehr (Peter) Thunberg en die Skotse reisiger, tuinier en plantversamelaar Francis Masson die bron besoek. Vroeg in die 19de eeu is hulle gevolg deur Jacob Abraham de Mist en Hinrich Lichtenstein in Oktober 1803 en die Wesleyaanse Metodiste-sendeling eerw. Barnabas Shaw in 1818.

Bibliografie

• Booyens, Bun: Bronwaters van genesing. Die tradisionele warmbron-waterkuur in ons volksgeneeskunde. Kaapstad: Tafelberg, vir die Raad vir Geesteswetenskaplike Navorsing, 1981. ISBN 0-624-01584-X
• Waring, Gerald A. en hersien deur Reginald R. Blankenship en Ray Bentall: Thermal springs of the United States and other countries - a summary. Washington: US Government Printing Office, 1965. (Geological Survey Professional Paper 492). Internet-aanlyn beskikbaar.
• www.thebaths.co.za